Minister Rocco Tjon ta tuma carteranan di ex minister Glenbert Croes

ORANJESTAD – Minister Rocco Tjon ta tuma e carteranan di ex minister Glenbert Croes pa e temporada cu falta ainda di e gobierno demisionario Wever-Croes II. Asina prome minister Evelyn Wever a bisa diabierna mainta den un conferencia di prensa. Awor cu Croes a retira como minister, su carteranan a bira ‘vacante’ y mester a ubica esaki un caminda. 

CONSEHONAN LEGAL

Consehonan legal ta duna e scenario aki como practicamente e unico pa tuma, mirando e situacion. Reparti e carteranan den varios otro minister, no ta un opcion pasobra e ora mester cambia ley atrobe basa riba e LIM (Landsverordening Instelling Ministeries) y si apunta un persona ‘nobo’, e mester pasa den screening, cual no tin tempo awor pa haci. E ora a opta pa duna e minister cu ta mas cerca di e carteranan en cuestion, cu a resulta di ta minister Rocco Tjon. Ta trata di e carteranan di Labor, Energia y Integracion.