Promotor “Aruban Music Festival” a perde caso contra gobierno

ORANJESTAD – Gobierno a cana e caso contra promotor di e serie di concierto “Aruban Music Festival”, esta Lee Tofanelli. E serie di festival a inicia na 2002 y a continua pa 7 aña mas. Ora gobierno ‘nobo’ a nenga di honra e contracto di 4 aña mas, y a culpa e minister anterior di a actua incorecto, e promotor a hiba gobierno corte. E hecho cu e promotor a perde su caso ta nifica cu gobierno no debe Tofanelli nada. E ta nifica tambe cu no tin necesidad di bringa e ex minister Edison Briesen (pa vrijwaring). Un sentencia diferente lo a nifica cu posiblemente e ex minister (Briesen) lo mester a posiblemente paga un suma cuantioso bek di por lo menos 1.7 miyon dollar mericano.

E CASO

E caso ta data bek for di 2010 ora cu gobierno na mando a dicidi di (basa riba conflicto cu ley di comptabilidad) para un contracto cu e compania di Tofanelli a firma (supuestamente) na october di 2008, valido pa 4 aña pa organisa e festival Aruban Music Festival, esta di 2010 pa 2013. Pero den corte a bin un discussion riba e fecha actual cu e acuerdo a wordo firma (2 luna prome cu eleccion 2009). Cu esaki e contracto tabata viola articulonan 25 y 31 di ley di comptabilidad, y mester a wordo para. Tofanelli a bringa bek y a exigi pa pague por lo menos pa e conciertonan di 2012 y 2013, (monta na 850 mil dollar pa aña, segun presupeusto stipula e tempo ey). Tambe a exigi pa page e perdida di ganashi di e añanan anterior.

VRIJWARING

G0bierno no a perde pa gana, y a determina cu e minister na turno e tempo cu e contracto a wordo firma, -den e caso aki Edison Briesen-0, e mester para responsabel pa un acto considera illegal. A cuminsa un caso di vrijwaring, cu ta nifica cu ta tene Briesen responsabel pa e pago y ta renuncia gobierno actual di cualkier gasto. Si gobierno a perde e caso aki, ta nifica cu Briesen lo por a haye cu un gasto miyonario, ya cu a pone ‘personalmente responsabel’ pa e caso aki. No ta conoci kico huez lo a dicta den e caso ey. Pero mirando cu huez a rechasa e demanda di Tofanelli, no tin sentido pa vrijwaring mas y a rechasa e demanda di gobierno den e parti ey.

APELACION

No ta conoci si Tofanelli lo por apela e sentencia aki, pues e caso aki no ta cla ainda y por haya un rabo mas largo. Notable ta tur e loke a sosode den e añanan di e conciertonan y desicionan cu a wordo cambia y traha, y e suma di placanan cu a wordo usa pa un concierto, cu for di documentonan, a resulta di no a produci e loke a pone pa e produci. Lesa e sentencia aki.