Diabierna ta dicidi si ta prolonga detencion di Glenbert Croes

ORANJESTAD – Dos dia despues di detencion di ex minister Glenbert Croes relaciona cu asuntonan di permiso, a surgi un silencio basta hermetico riba su caso. Asina mes abogado Demis Illis a confirma pa e portal aki cu su cliente a keda hospitalisa diaranson despues di tabata encarcela den un cel na warda di Shaba. 

INTERNA DEN HOSPITAL

 Debi na su situacion ‘legal’, lo tin polis pafo di su camber, pa evita comunicacion cu hende cu no ta su abogado of medico. A compronde tambe cu aunke cu e ex mandatario ta hospitalisa, e dianan di su detencion preliminar ta sigui conta. Esey ta nifica cu pa diabierna awor, Huez Comisario tin cu dicidi si ta prolonga detencion di e ex mandatario. Y si esaki ta e caso, mas sigur e lo keda traslada pa KIA unabez cu e bandona hospital. 

E CARGONAN

Manera ta conoci e ex mandatario ta wordo sospecha y culpa di soborno y abuso di su poder como minister desde cu e la asumi e cargo di e cartera di permisologia te cu awor. E ta parti di e caso penal Portulaca cu a cuminsa mas tempran e aña aki, unda cu algun persona a cay cera brevemente pa despues recobra nan libertad temporal te ora cu e caso mes bin dilanti.