RAPP: Detencion di reportero a limita derecho di periodista pa colecta noticia liber

ORANJESTAD - E detencion di un reportero diamars ultimo a limita e derecho di e periodista di colecta noticia liber, un derecho cu ta hancra den nos constitucion y tratadonan internacional (Artikel 10 EVRM). Asina e Red Arubiano di Prensa Profesional (RAPP) a comenta un dia despues di e detencion. “Door di no a opta pa un acercamento menos drastico ta haci e detencion desproporcional pa motibo cu a limita e derecho di colecta noticia liber mas cu tabata necesario, algo cu nos como asociacion ta desaproba pasobra e ta mina libertad di prensa” e asosac ion ta bisa.

GUIA INTERNACIONAL

“Como asociacion nos kier percura pa e puntonan di salida basico, e guia internacional di etica periodistico (Code van Bordeaux) y e principionan di RAPP, sirbi como base pa eherce e trabao di periodista” RAPP ta sigui bisa. Na final tur medio y tur periodista tin cu carga nan responsabilidad y esaki ta pa mantene nan mes na ley, na e limitenan di sociedad y tambe na loke e mesun publico ta spera di nos.

TRABOU DI PERIODISTA LIBER

“P'esey nos como asociacion ta boga pa trece mas guia y acuerdonan mutuo entre institutonan y prensa na Aruba pa asina por keda eherce e trabao di periodista liber”. Como e asociacion pa periodistanan na Aruba dedica na stimula e practica liber di periodismo y stimula e standard di comportacion etico, RAPP a bisa tamb di ta alinea su mes cu e asociacion di periodistanan Hulandes (Nederlandse Vereniging van Journalisten) den afirma cu nan no ta tuma como nan tarea pa desaproba cierto publicacionnan of sistemanan di traha. “ Tampoco nos kier dicidi ken por of no por eherce e trabao profesional di periodista. Esey lo crea un drempel pa acceso liber na prensa pa tur hende, un punto di salida hancra den nos constitucion, algo cu nos ta para p'e y ta defende, esta libertad di prensa” RAPP ta finalisa bisando.