Concepto ley CAFT ‘batata cayente’ caba sin yega parlamento

ORANJESTAD – E concepto di ley pa supervision financiero (landsverordening AFT) ya caba ta den problema, sin cu el a yega parlamento. Ta trata di e ley cu mester percura pa e creacion di e colegio di supervision di Aruba, entrante 1 di augustus proximo. Problema ta cu, gobierno di Aruba ‘no a tene nan mes na palabracion’ y e contenido ‘no ta cumpli cu e protocol’. Segun informacion cu NoticiaCla.com tin confirma, gobierno ,-despues cu e ley tabata na Raad van Advies-, a tuma esaki bek, cu e ‘orden di Hulanda pa cambia e contenido di tal forma cu Hulanda por biba cune’. Esaki ta pues trece tardansa atrobe den e proceso pa e keda cla na tempo pa 1 augustus.

LEY INCORECTO

Ora cu e ley a yega Raad van Advies, esaki aparentemente no tabata loke cu a wordo palabra cu Hulanda segun protocol di 2 di mei. Como tal gobierno lo a tuma esaki bek pa ‘ahust'e un poco’. E version 'oficial' aserca ta cu Raad van Advies tabata kier un 'artikelsgewijze toelichting' tambe.A compronde cu RvA lo hanja un concepto nobo y ta ser pidi pa manda e prome version bek. Segun informacion di fuentenan, e cambionan ‘no ta grandi y ta djies algun touch up’ a haci nan e ley. Ora cu NoticiaCla.com a bay investiga mas, ta resulta cu Hulanda kier pa loke ‘nan (Hulanda) traha mester wordo por tuma over sin mas’. Esaki ta nifica pues cu aworaki Hulanda a pone Aruba lomba contra muraya. Y si Aruba no pone e contenido manera cu Hulanda kier, ni si parlamento aproba e ley aki ‘as is’ (e version original), e lo no ta ok pa Hulanda. NoticiaCla.com a compronde cu e tardansa aki lo nifica cu e ley lo dura algun dia extra prome cu e yega parlamento pa tratamento. Unabez cu e cambionan ta haci, lo e continua su proceso pa e yega parlamento, posiblemente mitar pa fin di july. 

SENO POLITICO

Mes momento NoticiaCla.com tin confirma cu den seno di tur e partidonan, incluyendo AVP, tin masha disgusto cu e protocol aki. E problema ta, -p.e. den fraccion berde-, cu varios miembro di fraccion ta mustra nan desaprobacion cu e protocol aki. Si e contenido di e protocol ta un problema, e contenido di e ley awor, sigur ta un problema mas grandi ainda. A compronde cu pensamento di e fraccion ta cu Hulanda ta imponiendo y cu Aruba no tin nada mas di bisa den e asunto aki. Algun di e miembronan di fraccion ta considera e protocol como un ‘dictadura’ y no ta dispuesto pa acepta esaki sin mas. Otro miembro di fraccion a confirma cu e ta un topico hopi cayente den partido. Pero ningun no ta cla ainda pa bin afo publicamente ya cu nan no a ‘caba discuti esaki’ internamente ainda. Pero ta confirma y un hecho cu e fraccion berde tin problema cu e protocol aki. Partido MEP ya caba for di inicio tambe a bay contra e protocol aki, y Democracia Real a practicamente duna gobierno un 'brevet van onvermogen' cu e protocol aki.