Arends: Wever a retira di RAIZ pero ta keda minister te cambio di gobernacion

ORANJESTAD – Aunke cu Geoffrey Wever a entrega su retiro di partido RAIZ, e ta keda como minister te ora cu e gobierno cambia. Asina lider di e partido RAIZ Ursell Arends a confirma pa Noticiacla diamars merdia. Esaki pasobra den e comunicado di RAIZ no tabata cla, kico e retiro ta nifica mesora pa e gabinete y pa e partido. Segun Arends, e decision pa keda te na e cambio di e gabinete, ‘di e forma aki tambe nos por desplega madurez politico na nos comunidad” Arends a bisa Noticiacla. 

E RETIRO MES

Segun Arends, ta ayera tardi/ anochi (dialuna:red) partido RAIZ a ricibi e carta di retiro di Geoffrey Wever. Pero ta awe diamars merdia e partido a sali afo y anuncia e partida di Wever di e partido. No ta conoci si e la gara e partido di sorpresa pasobra esaki Arends no a vocifera. 

FUTURO DI WEVER

Mientras cu Wever a retira di e partido, pero -segun Arends- ta keda como minister pa e partido te final, ta dificulta e chens pa e subi riba un otro lista politico, manera cu ta wordo specula. E partidonan cu mas tabata menciona, tabata MEP y FUTURO, y awor esun cu mas ta wordo menciona ta FUTURO. Pero si e ta keda como minister, y sigur pa RAIZ, ta dificulta e chens pa e cambia di partido. Aki un siman, e lista di partidonan mester ta cla y ta dificulta e chens mas ainda. Esey ta nifica cu por compronde e ora cu Wever lo bolbe e mundo di abogacia, cual e tabata desplega prome cu e la subi e lista di partido RAIZ.