Gobierno di Aruba: Ta pendiente pa ricibi e carta di retiro di e minister

ORANJESTAD-- Gobierno di Aruba den su prome reaccion riba e detencion di minister Glenbert Croes, a bisa diamars merdia cu nan ta pendiente pa ricibi e carta di retiro di e minister. “Ministerio Publico a informa di detencion di colega Minister Glenbert Croes den un investigacion andando” e comunicado ta sigui bisa.

RETIRO

Manera cu noticiacla a raporta anteriormente tambe, ta sperando riba e retiro di e minister, conforme ley. “ Manera a wordo palabra adelanta, si un minister bira sospechoso, e ta entrega su retiro inmediatamente conforme articulo 17 di ley di Integridad di Minister” gobierno su comunicado a sigui bisa. “  Gobierno di Aruba ta pendiente pa ricibi e carta di retiro di e minister.

TRISTO

Gobierno a bisa tambe cu nan ta procesando e noticia dificil aki. “Ta un noticia hopi dificil pa nos Gobierno, y nos ta desea Glenbert Croes su famia y su sostenedornan hopi forza. Gabinete Wever-Croes 1 y 2 a y ta tene e bandera di integridad semper na halto, y den e caso aki no ta diferente”.