Confirma: Minister Geoffrey Wever ta retira di partido RAIZ

ORANJESTAD – Minister Geoffrey ta retira di partido RAIZ. Asina e partido a confirma diamars mainta laat. “ Plataforma Raiz ta desea di informa su miembronan, simpatisantenan y publico general cu miembro di partido, Geoffrey Wever a tuma e decision pa retira di e plataforma” e comunicado a bisa. Segun e partido, e decision tabata uno propio “y a wordo tuma a base di un bista diferente di con e como persona ta desea di sigui traha ariba pa nos pais y con politica mester wordo hiba”.  No ta bisa si, entrante ki fecha, ni si e ta keda como minister independiente te ora cu e gobierno cambia. 

INDISPENSABEL

E partido a sigura cu ningun hende ta indispensabel y semper mester tin espacio na tur esnan cu kier yuda genera cambio y promove ideanan nobo, sea cu nan ta simpatisante di Raiz of no. “Esaki ta nos vision pa politica na Aruba, progreso y cambio sin discriminacion politico” .

GRADICI 

“Raiz ta desea Geoffrey tur clase di exito cu su siguiente proyectonan y ta gradici’e pa e tempo y energia cu e la dedica na nos causa y pa Aruba” e partido a sigui bisa.SOSTEN

Ta conoci pa basta tempo cu tabatin rumornan ta circula cu Wever lo no ta mucho contento cu e forma con e partido cu e la cuminsa su carera cune, tabata move, y tabata buscando un forma pa sigui. Den fin di siman, a compronde cu e decision finalmente a cay, y cu esaki a keda presenta na e partido.