Na Corsou, Dudley Lucia ta keda eligí komo presidente di PNP

WILLEMSTAD.- Dudley Lucia ayera nochi a keda skohé komo e presidente nobo di Partido Nashonal di Pueblo (PNP). Despues di un situashon konfuso ku a sòru pa un di dos buèlta den e proseso yega na un presidente, finalmente miembronan a eligí sr. Lucia den e funshon. Ta importante pa menshoná ku Lucia tabata e úniko ku a postulá pa e puesto.

Manera ta konosí, PNP ta pasando den momentunan turbulento, pero kiko mas mihó pa laga su miembronan di primera órden yuda den restablesé disiplina den e partido. Partido Nashonal ta keda Partido Nashonal, ta un partido fundá pa e legendario Doctor Frumencio da Costa Gomez i ku ta bon ankrá den e komunidat aki.

Sr. Lucia a militá pa hopi tempu den filanan i órganonan di mas haltu den partido manera sekretario general, i asta a asumí e funshon polítiko di mas haltu den nos sistema, ku ta presidensia di Parlamento. El a fungi 10 aña komo presidente di Staten i pasa 20 aña den e órgano aki. Dudley ta un persona relativamente trankil i ku lo restablesé trankilidat den e partido.

Otro miembronan ku a keda eligí ayera nochi tabata: Dennis Evertsz, Kelly Gerard, Leonard Coffi, Henny Reinilia, Tyron de Palm, Renny Oehlers, Benjamin ‘Boy’ Doran. Lider polítiko, sra. Ruthmilda Larmonie-Cecilia outomátikamente tambe ta forma parti dje direktiva.

EXTRA a hiba un kòmbersashon breve ku sr. Lucia i el a duna di konosé ku tabatin i tin hopi entusiasmo bou di nashonalistanan. Ayera Kas di Pueblo tabata yen. Por sierto, tin nashonalista ku tabatin hopi tempu sin mira a kue e ruta bèk pa Kas di Pueblo. Ya kaba ta planiando pa ranka Sali pa bisa pueblo kiko ta e plannan di PNP pa e próksimo gobernashon, pasobra PNP tin sigur ku pueblo lo hink’é bèk den gobernashon pa kontinuá ku e trabou ku e tabata hasiendo. NOTA: Texto ta scirbi den Papiamento fonetico di Corsou.