Landsrecherche a haci entrada hudicial na cas di minister Glenbert Croes

ORANJESTAD – Landsrecherche a haci un entrada hudicial diamars mainta tempran na residencia di minister Glenbert Croes (MEP), relaciona cu e caso Portulaca (permiso). Abogadonan pa e minister Demis Illis y Vito Carlo a presenta na e cas, y Noticiacla a confirma cu esaki enberdad a sosode. For di abogado David Kock, a confirma cu e mandatario a contrata e bufete pa asistie cu e caso aki.  Mas informacion ainda no tabata conoci.  

CASO PORTULACA

Landsrecherche, bao guia di hues-comisario y Ministerio Publico y den cooperacion cu Cuerpo Policial di Aruba y RST (Recherche Samenwerkingsteam), dia 4 di juni ultimo a tene entrada hudicial  na 6 sitio, esta, dos cas, dos negoshi, Bestuurskantoor (Ministerio di Integracion, Labor y Energia) y DIMAS. E doorzoekingnan aki a tuma lugar den cuadro di un investigacion di Landsrecherche di posibel delitonan di corupcion y otro hechonan castigable relaciona cu otorgamento di permisonan di estadia entre 2020 y 2022. E investigacion aki ta conoci bou di e nomber di Portulaca.

Durante e doorzoekingnan, a tuma gegevensdragers (portadornan di dato) y administracion den beslag. Te na e momento ey, 3 persona a keda deteni. 

E investigacion di Portulaca ta draai rond di e pregunta si companianan por a obtene permisonan di estadia pa nan empleadonan a base di motibonan cu no ta cuadra cu ley.