DBB ta pidi Arubianonan na Florida, pa prepara pa pasada di horcan Milton

ORANJESTAD – Dialuna atardi, Direccion di Departamento di Relacionan Exterior di ARuba a emiti un peticion dirigi primordialmente na Arubianonan actualmente na Florida, Merca, relaciona cu e horcan feroz Milton.  Manera cu Noticiacla a raporta anteriormente, tin un grupo grandi di Arubiano actualmente di vacacion na Florida, y sigur den e area di pasada di e horcan, y tin tambe esnan cu ta studiando eynan. Pa nan, e situacion ta basta peligroso, pa cual DBB a dicidi di manda e mensahe aki. 

E HORCAN

E horcan Milton  ya ta ocacionando yobida y biento fuerte na Florida. Durante di e siguiente oranan ta spera cu e impacto di e horcan lo bay aumenta y ta premira cu pa diaranson e lo asota gran parti di Florida. “ Un peticion urgente ta bay pa tur persona di nacionalidad Hulandes y residentenan di Aruba, cu ta encontra nan mes na Florida, pa nan sigui e noticianan local y sigui instruccion di e autoridadnan estrictamente” DBB a bisa den su boletin.

CONSEHO

Consehonan importante cu DBB ta manda tambe ta e.o.:

•       Sigui instruccion di autoridadnan local: tur condado tin plannan di emergencia y refugio pa evacuacionnan obligatorio.

•       Riesgo di olanan di tormenta: e costa west di Florida ta enfrenta y lo keda un riesgo halto di ola di tormenta. Evacuacionnan ya caba ta tumando lugar.

•       Caida di biento y interrrupcion di coriente: E impacto mas grandi na entre otro Orlando ta caida di biento y posibel interupcion di coriente.

REGISTRACION Y NUMBERNAN DI EMERGENCIA:

Ta confia cu tur individuo tuma e medidanan necesario pa nan por keda safe durante di e pasada di e horcan. Reino ta conseha  esnan di nacionalidad Hulandes cu ta encontra nan mes na Florida den caso di emergencia pa inscribi nan mes via di e Servicio di Informacion di Asuntonan Exterior www.nederlandwereldwijd.nl. 

Den caso di emergencia por tuma contacto cu embahada hulandes  24 ora pa dia, 7 dia pa siman via e centro di contacto di Nederland Wereldwijd via e number di telefon:  +31 247 247 247 of via WhatsApp: +31 6 82 38 77 96.

 Pa mas informacion tocante kico por haci den un situacion di crisis por bishita e siguiente link: https://www.netherlandsworldwide.nl/crisis/what-to-do-crisis