Caso di asesinato di rumannan Menendez for di Merca por wordo trata di nobo

LOS ANGELES - Un di e casonan di asesinato mas controversial na Merca por wordo treci dilanti di corte atrobe. Fiscal principal na Los Angeles a anuncia cu e lo revisa e caso sensacional di asesinato di Menendez, cu a wordo treci bek den spotlight pa un serie di Netflix.

Esaki a aumenta e chens cu e rumannan Menendez, rond di kendenan e caso ta draai, lo wordo libera trempan, diferente medio Mericano a informa.

Lyle y Erik Menendez a asesina nan mayornan den nan cas na Beverly Hills na 1989 y a wordo sentencia na bida largo den prizon pa esei. E huicio di añanan 90 tabata un di e promenan cu a wordo mira pa miyones di hende rond mundo na television tur dia.

Un anochi na 1989, e rumannan, di 18 y 21 aña di edad e tempo ei, ta kana drenta e estudio di e cas di e famia cue skopet y ta tira te cu dieseis biaha riba nan tata y mama, kendenan ta sinta riba e sofa ta wak un pelíkula na e ora. Kitty, un ex reina di beyesa, y Jose, un ehekutivo disquero, ta wordo haya casi sin por reconoce nan  dor di e hagel di bala, segun informenan di polis.