‘Aruba Way Foundation cu donacion na Huize Maris Stella y Oral Health Foundation Aruba’

SAN NICOLAS – Tin hopi fundacion na Aruba cu ta traha duro pa bin cu projectonan nobo na bienestar di nan clientenan. Hopi biaha e fundacion tin e idea y e perseverancia pa sigui dilanti cu e projecto pero ta haci falta e fondonan necesario pa sigura cu e projecto ta un exito. Aki nan ta unda Aruba Way Foundation ta yuda! Aruba Way Foundation ta un fundacion cu ta yuda otro fundacionnan riba nos isla cu e parti financiero di un projecto. Despues di evalua cada projecto cu drenta Aruba Way Foundation ta wak unda mas por yuda y e biaha aki a dicidi pa yuda dos fundacion cu projecto nan importante pa nos comunidad.

SABA

E prome fundacion cu a ricibi un donacion ta SABA – Huize Maris Stella. Na Huize Maris Stella e team dinamico di cuido ta trahando un parke di recreacion caminda nos grandinan por cana, sinta y pasa un rato ameno. Considerando cu un cantidad grandi di e clientenan di e centro ta cana cu poco dificultad mester pone railing full rond di e parke y mester traha un cura pa asina e grandinan por ta sigur. E suma di AFl. 18.750 lo cubri e gastonan di e railing y tambe pa traha e cura. E director nobo di SABA, sr. Remo Kock y e lider di e projecto sra. Marita Tjou Tam Sin a keda masha contento cu e donacion y ya caba sra. Marita a cuminsa cu ehecucion di e projecto!

OTRO FUNDACION 

Oral Health Foundation Aruba, un fundacion relativamente hoben, ta e di dos fundacion cu a ricibi e suma di AFl. 10.000 pa cumpra materialnan necesario pa haci e Build A Smile project un exito. Nos mucha nan mester wordo informa y educa tocante e manera adecua pa cuida nan djente. E fundacion aki ta bishita nos scolnan primario pa asina educa e muchanan y como parti di e projecto y danki na e donacion di Aruba Way Foundation y otro partners cada mucha lo ricibi nan skeiro di djente cu e cap pa tene nan skeiro limpi.

Aruba Way Foundation ta contento di por yuda Huize Maris Stella y Oral Health Foundation Aruba cu dos projecto asina importante y ta desea nan hopi exito!