Parlamento na Corsou a aproba pa telefon celular den prizon bira legal

WILLEMSTAD - Cu un kantidat di 14 voto na fabor i 0 kontra ayera nochi Parlamento di Kòrsou a bai di akuerdo ku e kambio di Lei di Prizòn. Den e votashon ta 14 parlamentario a duna nan aprobashon komo ku ta solamente nan tabata presente e momentu di votashon. E shete parlamentarionan ku no a vota pa motibu di nan ousensia tabata srs. Steven Croes i Quincy Girigorie di PAR; Sheldry Osepa, Gwendell Mercelina i Elvin Gerard di PNP; Rennox Calmes di Trabou pa Kòrsou; i dr. Eduard Braam di MFK. A trata aki di un lei ku a kuminsá ku e trayekto for di aña 2019 i ku ayera a haña su konklushon.\

Un dje puntonan ku hopi hende kier a haña klaridat ariba ta e posibilidat pa hasi bishita sin supervishon, pues e posibilidat pa un detenido por risibí bishita di su partner pa por tin un ratu íntimo. Tin parlamentario a puntra si ta laga espasio pa famianan tambe por hasi bishita, pa evitá ku partnernan ta okupá bishita pa enkuentronan amoroso. Sr. David Seferina na nòmber di inisiadónan di e lei aki a splika ku en prinsipio esei ta posibel riba un siman, i pa e otro simannan ta keda espasio pa demas famia i konosínan por hasi bishita. Es mas, tin kaba di traha ainda riba e espasio ku lo ta reservá pa bishitanan sin supervishon.

Mas aleu tambe el a splika ku lo sigui ku desaroyonan internashonal. Echo ta ku mas i mas kompleho di detenshon i seguridat ta dunando espasio na detenidonan pa nan por hasi uso di telefòn selular i kòmpiuter. I ta importante pa e reiterá ku e uso di telefòn selular ta pa netamente hasi integrashon dje detenido den komunidat mas fásil i pa stimulá relashonnan familiar.

Pero ku e bista pa mantené seguridat di e kompleho aki, pe motibu ei Minister di Hustisia konhuntamente ku e direktor di e Sentro di Detenshon i Korekshon Kòrsou tin di stipulá reglanan si, pues no ta sin mas ta permití telefònnan selular den prizòn. Por sierto, uso di kòmpiuter ta den uso kaba pa metanan di edukashon, i esei t algu ku lo sigui komo e meta sentral tambe. Alabes tin e rekursonan nesesario pa limitá uso di internet den parameter di e kompleho di SDKK. NOTA: Texto ta scirbi den Papiamento fonetico di Corsou.