Mike Eman a reuni cu Niels Karlsberg di UNICEF

ORANJESTAD – Prome Minister Mike Eman, como hefe di Gobierno a ricibi dialuna mainta sr. Niels Karlsberg di UNICEF cu ken el a sostene un reunion. “Nos ta trahando hunto cu UNICEF riba e desaroyo di nos hobennan, con nos por percura pa nos muchanan haya e miho cuido, miho guia tanto na cas den e ambiente den bario como tambe nan formacion y educacion,” asina e prome mandatario a bisa.

TEMANAN

Un di e temanan principal cu a toca durante e reunion, ta e rapport di maneho integral prepara dor di Minister drs. Paul Croes. Den esaki, ta tuma e diferente iniciativanan cu tur departamento y ministerio tin, pone nan tur den un solo vision integral y di e forma ey yuda nos muchanan di tur sector. “Educacional, pero tambe social, deporte, husticia, siguridad y e aspecto comunitario,” Eman a bisa. UNICEF ta bay yuda Gobierno di Aruba den ehecucion di e plan aki.

COMUNIDAD

Prome Minister Mike Eman ta señala tambe cu comunidad y sector priva ta hunga un rol hopi importante den temanan cu UNICEF ta bisa cu por tin un influencia hopi positivo. Un di nan ta mas y miho guia y sosten na mayornan pa nan ta miho ekipa cu informacion di, por ehempel, e peligernan di mundo moderno. Aki, segun, Premier Mike Eman, ta caminda UNICEF por duna un contribucion hopi grandi.

PROYECTONAN

E mandatario a comparti cu sr. Karlsberg, informacion riba e dos programa cu su Ministerio ta trahando duro riba nan y ta dunando nan fruta. E prome ta Formacion Social (SVT) y e di dos ta introduccion, den cooperacion cu Ministerio di Enseñanza, di e Naschoolse Opvang (NSO). Eman ta kere cu, cu ayudo di UNICEF, por sigui expande e programa aki.