Miembronan Caribense di CFT tabata kier ‘kwijtschelding parcial’ di debe di Covid

ORANJESTAD – E miembronan Caribense di e colegio di supervision financiero pa Aruba CAFt y otro islanan CFT, tabata kier ‘kwijtschelding’ parcial di debenan di sosten di likides di Covid pa e islanan Aruba, Curaçao y Sint Maarten, y di BES. Algo interesante mirando cu tur e gobiernonan a pidi esaki, pero CFT a rechasa esaki. Awor ta resulta cu internamente, cos tabata ‘diferente’.

DISCURSO DI DESPEDIDA 

Esaki a bira conoci recientemente durante un discurso di despedida di e miembro pa CAFt, Hellen van der Wal. E tabata miembro pa Aruba entre 1 di augustus 2018 y  31 juli 2024. Na ocacion di un ceremonia recien di despedida y reconocemento pa van der Wal y bonbini na e miembro nobo Marion Agumbero, van der Wal a comparti hopi informacion durante su discurso di despedida, unda cu e la comparti hopi ‘insights’ di e colegio. 

KWIJTSCHELDING PARCIAL PA DEBE DI COVID

Van der Wal a mustra cu di e retonan grandi pe tabata durante pandemia cu a resulta den scarsedad severo di likides pa e paisnan den Caribe. “ En coneccion cu esaki, e Cftnan a wordo pidi dor di Conseho di Minister di Reino (RMR) pa hasi tareanan no-statutario. Por ehempel mester a calcula e necesidad di likides di e paisnan pa cada cuartal, a base di cua Hulanda a proveé ​​fiansa” van der Wal a splica a recorda e momento ora cu varios miembro Caribense di e colegionan di e diferente islanan, a protesta internamente, cual protesta a bira publico tambe. Ta trata entre otro riba e asunto di sosten di likides y con mester a anda cu esaki. “ Nos a sinti cu nos mester a conseha RMR pa duna e sosten di likides – por lo menos parcialmente – como un donashon (kwijtschelding)” Van der Wal a bisa. “Nos a anticipa cu e paisnan - parcialmente danki na nos conseho - lo ta carga cu debenan insostenibel, mientras cu nos como CFT tin e tarea legal pa duna conseho cu bista riba finansa publiko sostenibel” Van der Wal a sigui bisa.

DESEO A KEDA NENGA 

E deseo aki di e miembronan Caribense a worde nenga pa decisionnan mayoritario den tur colegio, riba e base cu mester laga esaki na politica, manera por a corda. “Esaki a resulta den un conflicto interno denter di e CFTnan. E conflicto interno ei tambe a wordo publica e tempu ey, p’esei mi por mencion’é aki.” Van der Wal a sigui bisa.

CONDICION PA TRANCHESNAN 

Di otro banda, e CFTnan a considera aktivamente e condicionnan bou di cua e varios tranchenan di sosten di likides a wordo suministra. Un ehempel di esaki tabata e condicion pa corta den gastonan di MWV. Aunke CAft inicialmente a bisa cu esaki mester ta 5 miyon pa aña, diripiente el a bira 5 miyon pa luna. “Esaki nunca mester a sosode, specialmente pasobra no tabatin substanciacion pa e sumanan aki. Con esaki no por ta un asunto político ta fuera di mi comprondemento”, Van der Wal ta finalisa bisando.