ATA segun encuesta: Mester evoluciona y drenta e siguiente era di turismo
ORANJESTAD - Aruba Tourism Authority (A.T.A.) ta continua cu e compromiso pa midi y compronde e sentimento di e comunidad local encuanto turismo. E prome coleccion di data a tuma lugar na 2018 durante e periodo di celebracion di Dia di Himno y Bandera cu bishita na varios Centro di Bario rond di e isla cu e meta pa ripiti e investigacion aki cada dos aña.
Den 2020, e investigacion aki no por a wordo completa pa motibo di e pandemia di COVID-19. Despues di e pandemia, A.T.A. a propone pa reevalua e sentimento di e comunidad pa asina por identifica cualkier cambio debi na e pandemia. Den mei 2022, cu asistencia di diferente studiante di Universidad di Aruba, A.T.A. a percura pa incorpora un metodo amplio pa colecta feedback, usando tanto encuesta online como tambe entrevistando miembronan di nos comunidad.
Den 2024, data a wordo colecta na cumienso di Maart, riba fechanan di 1, 2, y 17 riba Plaza Betico Croes durante e Evento Cultural, y riba nos dia Nacional di Himno y Bandera 18 di maart na varios Centro di Bario di entre otro; San Nicolaas, Savaneta, Brazil, Santa Cruz, Piedra Plat, como tambe na Royal Aruba Aloe y Museo Arqueologico. Un encuesta tabata disponibel via Qualtrics utilisando un link di URL y un codigo QR, cu a wordo comparti a traves di medionan di prensa local, plataformanan di red social di Oficina di Turismo (A.T.A.), y promovi di diferente manera. Alabes, ta di menciona cu a acerca y a ricibi participacion di trahadornan na diferente negoshinan local, y studiantenan di Universidad di Aruba y Colegio E.P.I. Ultimo dia cu participantenan por a yena e encuesta tabata dia 15 di april 2024.
Den 2024, A.T.A. a dicidi di haci un evaluacion(“review”) independiente di e methodologia usa p acu e Local Sentiment Survey. E evaluacion aki a wordo haci door di MGM Source y a enfoca riba diferente aspecto manera e metodologia aplica, preguntanan di e encuesta, ‘sample sizing’ y ‘target market’, e proceso di e coleccion di e encuestanan, ‘data entry process’, y ‘quality of collected results, confidence level y effectiveness’. Tambe A.T.A. a introduci un ‘thematic analysis’ pa por a segmenta tur e comentarionan colecta den topiconan. A.T.A. a inverti tempo den esaki y awor cu a completa e aspecto aki, ta pasa na comparti e resultadonan.
A colecta un total di 3,583 encuesta, di cual 2,053 encuesta tabata online y 1,530 tabata encuestanan ‘face-to-face’. Despues di a check pa erornan (por ehempel encuestanan no completo), a establece e cantidad final na 2,592 encuesta. Basa riba e poblacion local di 107,566 (Central Bureau di Estadística 2023), por conclui cu e total di encuestanan corectamente colecta ta carga un nivel di confiansa di 95% y un ‘margin of error’ di 5%. Segun e resultadonan revisa di MGM Source (e consultantenan cu e haci e revision) e cantidad di encuesta colecta (2,592) pa e encuesta di ‘Local Sentiment’ tin un nivel di confiansa di 99% y un ‘margin of error’ di 2.5% cu ta surpasa e minimo necesario.
Actualmente, A.T.A. ta tumando pasonan proactivo pa redefini e modelo di turismo a traves di ‘Responsible Tourism’ y finalmente ‘Regenerative Tourism’. Accionnan lo dirigi nan mes riba esaki cu aspiracion pa Aruba avansa y posiciona su mes como lider den practica di turismo responsabel y sostenibel pa generacionan cu ta sigui. Varios cambio a wordo comparti recientemente y lo sigui haci esfuerso pa sigui comparti esakinan.
Ta di menciona cu A.T.A. ta orguyoso di e ehecucion positivo y constante di e sector di turismo. Aruba ta continua di ta un di e mihor destinacion den region Caribe cu un demanda y posicionamento halto. Aunke cu esaki ta e caso, ta di reconoce cu nos destinacion ta na un crusada. Ta importante pa reconoce un cambio di sentimento di turismo mundialmente. E impacto negativo excesivo di turismo riba e comunidad anfitrion y ambiente natural ta real, y na Aruba nos no ta immuun na e ola di sentimento mundial aki.
Resultado
E resultado a indica cu un number significante di participantenan di e encuesta ta reconoce cu turismo ta un industria clave y e motor di e economia di Aruba. 68% di e poblacion di participantenan di e encuesta a expresa di ta contento cu e industria di turismo. Bou di esnan cu ta traha directamente den e sector di hospitalidad, esaki ta 75%, es decir e cantidad cu ta contento cu e industria.
Den un escala di 1 pa 5, 68% di e participantenan di e encuesta a ‘rate’ tursimo cu un punto di 4 (positivo) pa 5 (extremadamente positivo). Den total, esaki ta refleha un impacto generalmente faborabel cu un averahe di 3.9 punto. Na otro banda, entre e 32% di e participante cu a ‘rate’ extremadamente negativo pa neutral, 19% a opta pa duna un comentario adicional.
A percura pa segmenta tur comentario den topico principal. E topiconan mas menciona tawata; e volumen di turista riba e isla, repercusion economico (relata na labor, prijs di vivienda, e ganashi cu no ta yega na e pueblo, etc.), envolvimento di e comunidad limita cu un enfoke riba turista, e necesidad pa mehora e infrastructura, y consideracion pa cu nos medio ambiente/naturalesa.
Un otro pregunta cu a wordo haci na e participantenan ta pa duna un indicacion di nan preocupacionan principal. E participantenan a expresa varios punto di preocupacion, cu ta inclui: acceso na vivienda pagabel, presion riba e infrastructura, insuficiente beneficio directo di e entrada cu turismo ta genera, y daño na e medio ambiente/naturalesa.
Ta di menciona cu a colecta feedback for di un grupo di edad varia cu ta ser categorisa pa generacion di Gen Z (personanan cu un edad di 18 pa 27 ana cu un participacion di 12%) Millenials (personanan cu un edad di 28 pa 43 ana cu un participacion di 35%), Gen X (personanan cu un edad di 44 pa 59 ana cu un participacion di 35%), y generacion Boomers (personanan cu un edad di 60 ana bay arriba cu un participacion di 18%).
E reparticion a base di districto ta indica cu 32% di e participantenan a bini for di districto di Paradera/Santa Cruz, 27% for di e districto di Noord/Tanki Leendert, 22% for di Oranjestad, y 19% for di Savaneta/San Nicolaas. Un notable 82% di e participantenan ta emplea na e momento cu a completa e encuesta, y 70% ta den e rango di edad di 28 pa 59 aña. Aproximadamente 68% di e participantenan ta un mayor cu un average di dos yiu. Nivel di educacion entre e participantenan ta varia, cu 47% tin un Bachelor’s Degree of mas halto.
JOIA Aruba by Iberostar ta habri su porta e di tres siman di December 2024!
ORANJESTAD – E prome di e 3 hotelnan nobo den construccion na Aruba ta habri dia 18 di December 2024 definitivamente. Ta trata di JOIA Aruba by Iberostar. Esaki a keda confirma pa e ehecutivo di e hotel Dominique Meyer na Noticiacla diahuebs. ‘Si, esey ta corecto” Meyer a bisa. Esey kier men cu pa e fecha ey, lo tin e apertura di e hotel di 240 camber. E otro hotelnan ta St Regis y Secrets di otro cadena cu tambe ta habri nan porta den e proximo 6 lunanan na Aruba.
Vd Wal: No ta trata paisnan Caribense den Reino igual den cuadro di supervision financiero!
ORANJESTAD – “Paisnan Caribense den Reino no ta wordo trata igual den cuadro di supervision financiero”. Asina ex miembro di e colegio di supervision financiero pa Aruba, CAft, Hellen van der Wal a bisa recientemente den su discurso di despedida. Noticiacla den un cantidad di articulo ta reproduciendo partinan di e discurso, cu a mustra interesante unda cu van der Wal ta basta critico riba e funcionamento di e colegio. Pa loke ta su observacion riba e trato no igual, e ta mustra por ehempel con e introduccion di supervicion financiero na Sint Maarten y Corsou a bai kompañá pa restrukturashon di debe. Esaki ta splica tambe pakico e paisnan ey a bay di acuerdo na 2010 pa regula supervision financiero na nivel gubernamental. Segun van der Wal ta sigui bisa, supervision den e paisnan ei ta basa riba e asina yama regla di oro. Asina ta haci’e mas facil pa e paisnan ey haci inversionnan, specialmente pasobra a regla cu nan por fia barata via Hulanda. “LAft, di otro banda, ta enfoca riba reduccion di e debe nacional debi na e situacion financiero na e momento ey. Inversionnan mester cuadra den e presupuesto. P’esei, prestamo pa esaki ta efectivamente imposibel” van der Wal ta sigui bisa.”Prestamo ta aumenta e debe nacional. “Ademas LAft no tin ningun facilidad pa prestamo barata via Hulanda”.
Ex miembro di CAFt: Curioso cu Hulanda kier Rijkswet awor, mientras Aruba ta cumpliendo
ORANJESTAD – “Hulanda awor kier un ley di gobierno como condicion pa e refinanciamento di e fianzanan di Covid. Esey tambe ta curioso, pasobra awor Aruba tin su ciclo di presupuesto na ordo” ta palabra di ex miembro di CAFt pa Aruba, Hellen van der Wal den un discurso recien. Van der Wal durante su despedida a tene un discurso, den cual ta mustra awor cu CAFt no tur ora a funciona mes bon y corecto. Den varios articulo, Noticiacla lo reproduci esaki e proximo dianan. Van der Wal a trece varios di su observacionan den su discurso, den cual ta nota cu e tabata ‘basta’ auto critico riba e trabou cu CAFt a haci durante e periodo cu e tabata miembro.
ATIA: Efecto di welga di wafnan na Merca por tin efecto pa Aruba
ORANJESTAD – Como gremio comercial ta sumamente importante pa keda na altura di situacionan internacional cu por tin un efecto riba nos mercado local. Un situacion asina ta pasando den mundo di logistica actualmente na Merca door di un welga riba wafnan na costa oost y e asina yama “Gulf Coast”, cu ta afecta e sector di exportacion/importacion, transporte maritimo y maneho di suministro di mercancia (“supply chain management”). ATIA asina a informa kico esaki por significa pa Aruba su economia local.
Miembronan Caribense di CFT tabata kier ‘kwijtschelding parcial’ di debe di Covid
ORANJESTAD – E miembronan Caribense di e colegio di supervision financiero pa Aruba CAFt y otro islanan CFT, tabata kier ‘kwijtschelding’ parcial di debenan di sosten di likides di Covid pa e islanan Aruba, Curaçao y Sint Maarten, y di BES. Algo interesante mirando cu tur e gobiernonan a pidi esaki, pero CFT a rechasa esaki. Awor ta resulta cu internamente, cos tabata ‘diferente’.
Venezuela a exporta cerca di US$ 6 miyon na mercancia pa Aruba y Corsou den 7 luna
CARACAS - Juan Gotopo, vice presidente di Camara di Comercio di La Vela de Coro den e estado di Falcón, a declara cu pisca ta e producto nobo cu ta wordo exporta for di Venezuela pa e isla di Curacao. E vice presidente di Camara di Comercio La Vela de Coro den estado Falcón, Juan Gotopo, a informa cu den e prome 7 lunanan di e aña aki, alrededor di US$ 6 miyon na mercancia a wordo exporta for di Venezuela pa e islanan di Curacao y Aruba. .
Follow NoticiaCla
