Do Nascimento: Partido LPR ta cla pa bay eleccion na December!

ORANJESTAD – Parlamentario independiente Ryçond Santos do Nascimento a confirma dialuna mainta na Noticiacla cu e ta participa definitivamente cu su partido Lucha pa Reforma (LPR) den e proximo eleccion parlamentario na December proximo. E ta bira asina un di e partidonan nobo cu ta participa den e proximo eleccion. Segun e parlamentario, su candidatonan ta cla, su programa di partido ta cla, su lista ta cla y e ta ‘bay p’e. Ultimo dianan tabatin hopi rumor ta circula cu e lo a legumai e partido y join cu un otro partido. Esaki sinembargo a keda desbarata pa e politico. 

PARTIDO CENTRO DERECHA

Segun Do Nascimento, su partido ta uno Centro derecha Cristian Democrata. Riba un documento adhunto por mira cu e tin por lo menos 8 punto di enfoke, y unda cu e ta splica mas di e partido. Entre otro e ta splica cu un centro derechista ta balansa un economia fuerte cu responsabilidad social, combinando un postura conservative riba asuntonan social cu un compromiso cu e bienestar social-democratico. E ideologia aki ta crea un Sociedad mas husto caminda prosperidad economico y husticia social ta bay man den man. Segun Do Nascimento, Lucha pa Reforma ta un movimento pa cambia Aruba profundamente basa riba e principio Cristian Democrata pa haci Aruba prospero di berdad.