Prome salida di ‘Shoco Sa Spel” considera como exito rotundo

ORANJESTAD - Un total di 45 alumno di klas 6 di e scolnan basico Commandeur Pieter Boerschool, Colegio Cristo Rey y Scol Basico Washington a participa dialuna mainta na e proyecto piloto pa introduci Aruba su version di Spelling B’s esta “Shoco Sa Spel”. Minister di Enseñansa Michelle Hooyboer-Winklaar y organisadonan tabata hopi contento cu e resultado, esta un tremendo bataya di “spelling bee” cu tabatin tur esunnan presente den un tension grandi. Den e di seis tanda, Zinzi Ho di Colegio Cristo Rey a resulta e competido mas fuerte entre e tres participantenan cu a resta. Cu deletreo di e palabra “lechuga”, Zinzi a gana e proyecto piloto Shoco Sa Spel.

PAPIAMENTO

E organisadonan, Ministerio di Enseñansa y Fundacion Bon Nochi Drumi Dushi, a scoge pa uza Papiamento como e idioma pa e proyecto piloto. E “spelling bee” nacional na october lo ofrece alumnonan e oportunidad pa scoge entre e cuater idiomanan mas uza na Aruba: e idiomanan oficial Hulandes y Papiamento, mas Ingles y Spaño. Na final di e seis tanda a keda den di tres luga, Nigel Gomez di Commandeur Pieter Boerschool y den e di dos luga, Nashmalia Fullinck di Colegio Cristo Rey.