Parlamentario Tromp (MAS) a entrega keho contra iregularidad den SSA

ORANJESTAD – Parlamentario Marisol Tromp (MAS) diahuebs a confirma cu e mainta ey, e la entrega na Ministerio Publico pruebanan cu el a ricibi di malversacion den un fundacion di deporte di gobierno cu ta resorta bou minister Endy Croes. Segun Tromp, hopi biaha hende ta tende rumor y ta papia riba caya pero e parlamentario ta sigura cu e la ricibi pruebanan preto riba blanco y e ta compronde e consternacion cu tin riba e caso aki paso ta trata di berdad over di mal uzo di funcion di e director di Stichting Sportsubsidie Aruba (SSA) pero ta wak tambe cu valsheid in geschrifte ta tuma lugar. “Hopi biaha bo ta core den caya y ta wak hobennan para riba caya ta pidi placa cu bleki den man ta sacudi paso nan mester di placa pa por haci nan deporte y bay afo” e ta bisa.

PLACA DI SUBSIDIO NO TA YEGA NAN DESTINO 

Parlamentario Marisol Tromp a splica cu loke el a entrega ta entre otro documentonan cu prueba cu tin peticionarionan cu ta haci deporte of ta di cierto organisacionnan cu ta inclui hobennan, y nan ta haci peticion pa wordo susbidia, por ehempel, pa bay den exterior y e minister responsabel pa e cartera aki Endy Croes ta haya e petishon aki y aunke e peticion ta pa un fundacion, e minister ta aproba cierto sumanan y bo ta mira aki cu e placa no a yega su destino. Ora hendenan a tuma nota di esaki bo por wak cu e invoicenan ta falso. Ora el a wak e documentonan cu el a ricibi, por mira cu e placanan no ta bay pa e fundacion of hobennan sino ta un invoice falso. Enbes cu e placa bay pa e compania, hoben of organisacion, e placa no ta yega nunca cerca e organisacion of muchanan.

RECIBONAN TA WORDO FALSITIFICA 

“Al contrario, e invoicenan ta falso y ora di controla bo ta mira cu tin reisburo’s involvi y unda asta documentonan di nan a wordo falsifica. Kiermeen e documento ta aparenta despues cu el a bay pa e director mes y su famia y otro personanan cu nan nomber ta riba dje y cu por ehempel a biaha cu e suma aki” Lopez ta sigui bisa. Esaki segun Tromp, ta un ehempel chikito pa compronde cu ta abuso y ladronicia di placa cu ta destina pa un meta ta wordo mal uza pa un otro meta y no djies un of dos biaha sino den un forma structural. E ta mane un modus operandi, un manera di trata cu placa di fondonan cu tin un destinacion y cu no ta bay pa e destinacion aki. Ora bo wak e papelnan ta parse mane cu e ta bay e destinacion aki, pero ora abo wak bon, e no a yega nunca e meta cual ta e hoben, e mucha, e vereniging di sport. E placa nunca a yega su destinacion.

MODUS OPERANDI 

“Aki tin hopi forma cu el a wordo haci y loke mi a haya den mi poder, esey mi a entrega y ta un bunch basta grandi di tur e pruebanan”, asina parlamentario Marisol Tromp ta trece dilanti. E parlamentario di MAS ta haya hopi lamentabel cu un gobierno cu ta papia di integridad, no ta prome bes cu ta wak e tipo di modus operandus aki y vooral cu e minister aki ya a hay’e envolvi den un caso similar antes. Awor aki por mira cu esaki ta sosode atrobe y laga husticia haci su trabou.

.