Cargonan contra parlamentario deteni Constancia ta conoci

WILLEMSTAD – Parlamentario Jacintha Constancia ta sigui deteni, un dia despues cu e la presenta na warda di polis na Rio Canario pa un ‘combersacion’. Cargonan mientrastanto pa cual e ex minister y actual parlamentario ta deteni, ta conoci. E cargonan ta inclui fraude, malversacion, labamento di placa, y falsificacion di document. E ta trata e caso ‘Dubnium’, unda cu den pasado caba algun persona a cay sera ‘brevemente’, incluyendo e caso di Constancia. Detencion di e parlamentario di MFK ta sigui pa 24 ora mas, of te ora cu e interogacion termina.

MONDKAPJES

Constancia ta wordo cuestiona pa e asunto di e asina yama compra di ‘mondkapjes’, pero cual producto nunca no a yega su destino. Tabata durante e periodo di gobernacion Schotte, cu lo a haci un pedido di 365.000 mil florin na ‘mascara facial’ o sea mondkapje serca e fundacion Bureau Ziektekosten Voorziening. E placa lo a wordo paga, pero nunca no a mira e mondkapjes. Esey a pone cu a dicidi di haci un investigacion cu a conduci na un serie di detencion, y entrada hudicial, incluyendo cas di Constancia mes, su mama y su casa (ex).

PARTIDO

Na Telecuracao, presidente di e partido Amerigo Thode a lamenta e suseso, y ta admiti cu e no ta pone e partido den un luz positivo. Mes momento sinembargo, e no ta kita e partido di sigui su caminda pa haci loke e tin cu haci. Constancia ta e di tres persona di e partido cu ta wordo sospecha di ta involucra den actonan contra ley. Esaki ta inclui propio lider di e partido Gerrit Schotte (cu ta presenta dilanti mesa berde na September den caso Babel), y e propio presidente di partido Thode, cu ta wordo culpa di a illegalmente graba combersacionan den parlamento