Sport Subsidie a entrega keho penal pa iregularidad detecta den su fundacion

ORANJESTAD – Despues cu algun dia pasa Fundacion Sportsubsidie Aruba (SSA) a confirma cu tabatin iregularidadnan tumando lugar den su fundacion pa cual a cuminsa un investigacion, un dia despues, nan a confirma cu “diaranson 25 di september 2024, a entrega un keho penal na autoridadnan di landsrecherche pa loke ta trata iregularidadnan detecta dentro di e fundacion”. No ta conoci contra cuanto persona esaki ta, pero ta mustra cu sigur un persona, den e caso aki e persona K. Vrolijk.  Segun SSA, e iregularidadnan detecta ta regarda transaccionnan financiero sin cu e obhetivonan deportivo planea a wordo realisa.

SSA a reafirma su compromiso pa actua diligentemente y eficientemente den atende e asunto aki, y kier sigura e publico cu e resultado di investigacion interno cu tur documento a wordo entrega na husticia. Asina tambe nan a aclarea cu ningun di e miembronan di Hunta di Supervision (Raad van Toezicht) ta envolvi den e acontecimentonan, y ta desmenti asina e informacion eroneo difundi anteriormente den medionan di comunicacion. Finalmente SSA a bisa cu nan ta laga e proceso aki den man di e autoridadnanhudicial corespondiente pa haci nan trabou.