Mayoria turista venezolano no ta keda den hotel regular mas

ORANJESTAD – Mas di mitar di venezolanonan bishitando Aruba, ta prefer keda den un apartamento of otro lugar di hospedahe, enbes di hotelnan regular. Informacion publica pa Aruba Tourism Authority a señala un tendencia interesante durante e luna di mei, unda cu no menos cu 55% di tur venezolano cu a bishita Aruba como turista, a keda den un apartamento, guesthouse, villa of otro lugar. Segun ATA, e consumidor di awendia en general ta buscando otro tipo di acomodacion y pa esaki ta importante pa enfoca riba e tendencia aki. “ En todo caso, un kwart di esnan cu a bishita Aruba aña pasa a keda na un acomodacion ‘others’ y di esaki mayoria ta procedente di e mercado di Venezuela”.

INFORMACION RIBA HOSPEDAHE

Aruba Tourism Authority conhuntamente cu un grupo di expertonan ta conduciendo diferente bishita na diferente acomodacionnan pa turista cu ta disponibel riba nos isla.Obhetivo principal pa cu e inventarisacion aki ta pa asina haya mas informacion riba e tipo di acomodacion cual lo duna Aruba Tourism Authority un indicacion riba e calidad di e producto cu ta wordo ofreci actualmente na nos bishitantenan. Claro ta importante pa tipo di tendencianan asina aki cana conforme reglanan y leynan vigente etc. No solamente den e area di oferta aki, pero tambe e.o. esun di medio di transporte.” Tur esnan ofreciendo cualkier servicio mester competi na un manera husto, conforme reglanan y leynan vigente!”.