Red di cocaina pa Hulanda exponi: Sospechosonan ta tokante incorpora droga den fertilisante

TOLIMA – Un red extenso di contrabanda cu tabata transporta cargamentonan grandi di cocaina for di Colombia pa Hulanda a wordo exponi pa husticia den e pais Sur Americano. Danki na declaracion di sospechosonan, y cu ayudo di servicionan di investigacion di exterior, e ‘clientenan’ na Hulanda tambe a bira conoci. E medio Semana ta raporta esaki. Husticia na Colombia ta papia di e contrabanda di ‘narco-compost’: fertilisante mescla cu narcotico cu a yega Hulanda di e forma aki. Cocaina tambe tabata wordo envia secretamente pa e hafnan entre carga di carbon y coffie.

RUTA DI DROGA PA HULANDA

Despues di e prome serie di detencion aña pasa, algun sospechoso a declara tocante e metodo, ruta y clientenan di e red di coke. E comersio di droga tabata principalmente coordina na Tolima, un departamento den west di Colombia. Pero otro lokalidadnan tambe a hunga un rol den e organisacion criminal.

Cu sosten di polis y declaracionnan di entre otro lider di logistica di e gang, Fiscal a logra mapa henter e structura criminal. E lidernan ta conoci, pero tambe ta esnan responsabel pa soborna oficialnan - cu a percura pa e droga  wordo transporta sin riesgo riba caminda y den haf y aeropuertonan. Na momento di desmantelacion, a descubri un ton di coke. A mira lasonan cu e ex organisacion terorista FARC.