Hopi partido politico tin problema pa haya candidato

ORANJESTAD – Parce cu tin varios partido politico, tanto ‘bieu’ como nobo, cu tin problema pa haya candidato pa subi nan lista. Varios comentario di personanan envolvi cu e proceso, a confirma cu nan tin problema pa haya hende pa activamente subi e listanan pa e proximo eleccion. E interesante ta cu e problema no ta solamente pa partidonan nobo, pero partidonan existente. 

MIEDO PA REPRESAYA

Loke cu Noticiacla a compronde di e informacion acumula, ta cu hendenan cu ta wordo acerca, tin hopi duda y resistencia pa tuma e paso grandi pa publicamente asocia cu e partido en cuestion y tambe subi e lista finalmente. Nan ta bisa cu nan tin miedo pa represaya politico y cu e por afecta nan futuro carera y of negoshi. No tin problema pa sostene e partido na banda, y of den otro forma, pero ora cu puntra pa subi e lista mes, esaki ta bira un problema y ta nenga. 

PARTIDO GRANDI

Un partido cu a publicamente bisa cu nan no tin problema, ta partido MEP, cu riba su mes tabatin un reto pa reeemplasa por lo menos 11 candidato cu tabata riba e lista anterior. Nan problema ta cu nan tin suficiente y mester haci escogencia. Ademas, tin tambe miembronan cu ta riba lista cu lo mester cambia di posicion riba e lista, y esey ta e reto. Partido AVP tambe a cuminsa anuncia nan candidatonan nobo, poco poco, y no tin indicacion cu nan lo tin problema pa haya candidato. 

PARTIDONAN CHIKITO

Ta mas bien partidonan chikito cu tin problema pa haya candidato nobo. Un di e problemanan ta, cu e partidonan grandi no tin, ta siguransa cu si nan subi lista, cu realmente esaki por traduci den un funcion politico despues. Un candidatura riba sea MEP of AVP, tin mas chens pa e persona logra un posicion (dependiendo di e ubicacion riba e lista si) compara cu esun chikito. Pues esey ta trece na duda, si e persona cu risca su carera of futuro, tin un chens cu e partido chikito, y si e ta bal e risico di subi lista, pa despues no logra ‘nada’. E ta keda marca si politicamente, y cu tur consecuencia p’e y su famia te hasta.

TEMPO CORTICO

Loke ta dificulta e proceso tambe ta e sorpresa di caida di e gabinete Wever-Croes II prome cu tempo. Esaki a gara hopi partido ‘offguard’, aunke cu hopi tabata papia semper cu ‘e gobierno aki no ta wanta’, pero cu en realidad esaki no a nifica necesariamente cu e partido cu bisa esey, tabata realmente cla pa un caida. Y algun a te hasta culpa e gabinete, cu a pone cay deliberadamente net algun dia despues cu e fecha ultimo pa registra partido nobo, a vence. Entre nan tin e persona conoci Giovanni Trim, cu a haci e grito aki, y mes momento anuncia cu e ta bay lansa su partido politico nobo asina mes. Fuera di Trim, tin mas partido cu a mustra cu nan a wordo gara di sorpresa, y cu esey ta dificulta nan proceso di haya candidato. Algun partido existente chikito, tambe tin problema pa completa nan lista. Un di nan, CURPA a bisa recientemente cu nan tin 8 candidato confirma y ta den proceso pa convence algun mas pa subi e lista pero no ta confirma. Caya ta papia tambe cu e partido nobo FUTURO tambe lo tin problema pa haya candidato, pero esaki no por a keda confirma pa Noticiacla.