Valero conciente di mocion politico pa para desmantelacion

ORANJESTAD – Mientras cu e proceso di desmantelacion ta continua na Valero, e refineria ta conciente di e esfuerso di politiconan di Aruba pa purba para esaki. “Nos sa di e mocionan den parlamento pa un posibel retraso di e proceso pa kita ekipo di e sitio” vocero corporativo di e compania, Bill Day a sigura NoticiaCla.com dialuna. “Tambe mi por confirma cu oficialnan di Valero ta den discusionan awor cu oficialnan di gobierno di Aruba riba e futuro di e sitio di e refineria” Day a sigui bisa. Esaki den cuadro di e intentonan ultimo simanan di tanto gobierno, fraccion di MEP y tambe Democracia Real.

CHENS PA PARA COS

E discusionan aki ta continua entre gobierno y Valero  pa sigura un solucion riba e uso ultimo uso di e sitio unda cu e refineria ta situa. Segun Day, mientras cu e proceso di desmantelacion ta sigui segun plan, e unidadnan mayor di produccion no a wordo desmantela ‘ainda’. Pues tin chens cu esaki por para. Tin indicacion cu tin cambio di pensamento na Valero, despues cu apenas algun siman pasa ainda, e refineria a bisa cu no tin plan pa para e desmantelacion. No ta conoci si ta presion di gobierno of e ultimo intentonan di fraccionan di e.o. MEP y Democracia Real, a logra esaki. De hecho, Day ta haci mencion specific di ‘politiconan’, y tambe ‘oficialnan di gobierno’, pues por bien ta cu un combinacion politico a trece cambio den e pensamento di e refineria.

CARTA DI BIKKER

Tabata den fin di siman cu parlamentario y lider di partido Democracia Real, Andin Bikker, a manda un carta urgente caminda e ta expresa e deseo pa Valero Energy Corporation para su plan pa desmantela e refineria. Bikker a manda e carta den luz di entre otro e mocion presenta pa su persona recientemente den Parlamento, cual a wordo acepta unanimamente, pa institui un comision special pa explora e posibilidadnan di re-apertura di e refineria.

NOTICIA DESMANTELACION

Bikker a haci mencion tambe di e hecho cu e siman cu a pasa, e ehecutivo halto den Valero, sr. Bill Day, a expresa na NoticiaCla.com entre otro, cu Valero lo no tin intencion di para su plannan pa desmantela e refineria. “ E noticia aki a trece hopi confusion, ja cu e ta contradeci loke e Minister encarga cu asuntonan di Energia a declara” Bikker a bisa den su comunicado. Fuera di esey, si Valero no para e desmantelacion y pone on hold, e mocionnan cu Parlamento a aproba ta core risico di perde sentido y ta bira mas dificil pa interesa companianan pa inverti den e refineria.