Gobierno di Corsou a inverti 7 miyon pa cumpra tres truck di bombero

WILLEMSTAD  - Ayera komandante di brantwer Kòrsou, e Arubiano ing. Jair G. Tromp MBA a entregá minister di hustisia Shalten Hato e dokumento pa Destaho Públiko pa tres brantspùit. E vehíkulonan lo hisa e kalidat di servisio na komunidat.

Di akuerdo ku minister Hato ta bai start e trayekto di kompra di tres brantspùit nobo nobo pa brantwer Kòrsou pa por sigui sirbi komunidat i ekipá brantwer ku e materialnan nesesario. A pone kasi 7 mion disponibel pa brantwer Kòrsou por haña tur e materialnan ku nan mester. A kaba di finalisá tambe e destaho públiko masha kòrtiku ku tabatin pa un “Dekkingsplan”. E “Dekkingsplan” ta investigashon ku tin di hasi pa e mihó lokalidat di kazèrne di brantwer na Kòrsou, i investigá e kaminda e kazèrnenan di brantwer ta situá aktualmente. E “Dekkingsplan” mester bisa unda i kuantu kazèrne mester i pa ekipá esakinan ku material i personal tambe. Esaki ta un parti di modernisashon dje kuerpo di brantwer. E investigashon ta den man di ekspertonan. Sr. Hato a bisa di ta spera ku e investigashon ta yuda gobièrnu i mando di brantwer tuma e mihó desishon.

Mas aleu minister Hato a deklará ku gobièrnu ta sigui invertí den kadena hudisial den e seguridat di pais. Hopi biaha ta tende gritu ku mester tin un pòst di brantwer Pariba tambe. Ku e investigashon aki ta bai saka afó sea ta bai realoká pòstnan ku tin òf e alokashon ku tin ta bon òf mester bin un òf dos mas pòst di brantwer, i sigur unu na parti Pariba. Pronto e investigashon lo keda kla pa presentá na komunidat. Lo bai sòru pa brantwer ta bon ubiká p’asina nan por yega mas lihé ora tin kualke kalamidat ku nan tin di aktua i duna servisio, di akuerdo ku minister Hato.

Tambe ta bai digitalisá brantwer ku a start, i asina e kuerpo ta bai traha mas avansá i lihé, i esaki sigur ta bon pe personal. Ta bai outomatisá e kuerpo di bombero. Na òktober ta bai selebrá Dia di Bombero, i lo keda selebrá engrande, Minister Hato a terminá bisando. NOTA: Texto ta scirbi den Papiamento fonetico di Corsou.