Na Corsou Larmonie-Cecilia ta bira lider di fraccion PNP y Gerard colaborado di fraccion

WILLEMSTAD - Kosnan ta kanando zetá den Partido Nashonal di Pueblo. Asina presidente Efrèn Candelaria ta deklará despues di reunion di partido di djaluna 23 sèptèmber. E desishon ta bira ku lider polítiko Larmonie-Cecilia ta drenta Parlamento i lo bira lider di frakshon kaminda e por vosiferá e posishon di PNP den Parlamento i tambe na pueblo di Kòrsou.

E desishon di PNP pa laga lider polítiko bai parlamento ta un punto ku a diskutí den Konseho di Partido kual órgano ta konsehá direktiva riba puntonan di embergadura polítiko, Candelaria ta duna di konosé. “PNP ta un di e partidonan ku ta duna partisipashon na su miembronan ku por tin un opinion ku ta diferente na esun di Direktiva.”

Candelaria ta sigui bisa ku parlamentario Elvin Gerard ya kaba a manda su karta di retiro pa presidente di parlamento pa asina e proseso por start pa Larmonie-Cecilia drenta parlamento. Pa loke ta e posishon di kolaboradó Lisette Jansen, direktiva a kombersá ku e miembro aki ku ta  gosa di rèspèt di direktiva, kaminda partidonan a yega na e palabrashon ku interes di partido ta na promé lugá.

A disidí ku Gerard lo bai funshoná komo kolaboradónan di frakshon di PNP huntu ku sra Winklaar i ku Jansen lo bai okupá un otro funshon den gobièrnu. “Mester bisa tambe ku no tin kestion di ku esun ku drenta mas lat tin ku bai promé, pero e persona ku ta funshoná komo kolaboradó di frakshon di PNP mester kumpli ku e profil pa yuda sostené e parlamentarionan ku ta tres ku entrada di Larmonie-Cecilia den frakshon di PNP”, Candelaria ta bisa.

“Mirando ku ta 5 luna i mei a keda promé ku elekshon, PNP ta hasi e moveshonnan ku ta kuadra ku un strategia i komo tal e kolaboradó Winklaar lo ta un di dos kolaboradónan di PNP ku lo sostené frakshon di PNP. PNP tin un kompromiso serio ku pueblo di Kòrsou ku ta konta ku firmesa, sinseridat i seriedat na ora ta goberná Kòrsou.”

Mas aleu Candelaria ta trese dilanti ku ya ta konosí kua ta e motibunan ku e ministernan di PNP no ta den gobièrnu mas. “Komo partido ku tin 76 aña di eksistensia nunka nos lo no aseptá un ‘indescent proposal’ pa atendé ku dos di no parlamentarionan ku ta tene parlamento bibu. Si esei sosodé, lo no tin rèspèt pa PNP ni pa su siguidónan.”

Relashoná ku e desishon di Corine Djaoen-Genaro pa el a bai ku asiento di PNP, Candelaria ta bisa ku komportashon di e parlamentario ta demostrá ku e no tin prinsipio. “Esaki ta bisa tur kos. PNP ta deseá   Djaoen-Genaro tur klase di éksito ku awor despues di kasi un luna e ta sali bin konta kos pa parti lubidando su fayonan kometí. NOTA: Texto ta scirbi den Papiamento fonetico di Corsou.