ATA: Aruba ta keda popular den ricibi huespednan cu ta ripiti nan bishita regularmente
ORANJESTAD - Aruba ta conoci pa su nivel halto di huespednan cu ta bishita e isla frequentemente. Por indica cu 53.6% di e huespednan aki ta Baby Boomers cu principalmente ta keda den Timeshares. Unda cu generacionan, manera Millennials y Gen X, ta prefera keda den hotel European Plan. Aruba ta atrade 50.7% di e huespednan cu tin un bon entrada anual di $100,000 of mas, for di esaki 35.1% ta prefera keda den hotel European Plan. ‘Word-of_Mouth’ ta keda un influencia fuerte, unda cu 70.1% di e huespednan ta busca conseho for di famia y/of amigonan. A pesar di nan lealtad, 64.5% ta keda busca variedad na otro destinacion, pero asina mes ta keda bolbe Aruba. Por menciona cu hasta Millennials ta prefera di bolbe regularmente na un pais manera Aruba. En general, por indica cu e huespednan aki ta gusta gasta mas na entretenimento y excursion, pero esnan cu ta keda na hotel European Plan ta mas dispuesto pa gasta den gastronomia y experencianan luhoso. Na final, 72.8% di nos bishitantenan ta planiando pa vacacion na un playa/laman den e siguiente 12 lunanan, unda cu 46.3% lo probablemente combina esaki cu un ‘guided tour’.
A.T.A. lo keda pone enfasis pa mehora y mantene esfuerzonan pa logra e balans menciona segun e modelo di High Value-Low Impact cu ta consisti di cuater pilar; ‘Calidad di Bida di e Residente’, ‘Calidad di Experiencia di e Bishitante’, ‘Proteccion y Preservacion di Naturalesa & Medio Ambiente’, y ‘Contribucion Economico na nos isla’. Lo enfoca na atrae e bishitante cu lo inverti mas, pero alabes e bishitante cu ta mas consciente y ta balora y proteha nos cultura, naturalesa, tera, awa, nos hende, y nos economia.
ESTADISTICA CONFORME ACTUALISACION DEN E INDUSTRIA DI TURISMO:
VOLUMEN (“STAYOVER”) CU RESULTADO POSITIVO ADICIONAL DI 17.5% DEN AUGUSTUS 2024 COMPARA CU AUGUSTUS 2023
Conforme e demanda por bai mira tambe cu e aerolineanan lo sigui expande capacidad y asina permitiendo nos captura e demanda. Den augustus 2024, Aruba a ricibi un total di 126,058 huesped “stayover”, esaki ta un crecemento di 17.4%, si compara cu augustus 2023, unda a ricibi 107,403 huesped “stayover”.
MERCADONAN Y CATEGORIANAN DI ACOMODACION
Den augustus 2024, 77.7% di e total di e huespednan “stayover” pa Aruba a bishita for di Norte America, 5.6% a bishita for di Europa, 13.7% a bishita for di Latino America y 2.9% tawata procedente di otro partinan di mundo.
Mirando e categorianan di acomodacion, den augustus 2024 25.5% di huesped a keda den hotelnan European Plan, 16.5% a keda den hotelnan All-Inclusive, 26.4% a keda den Timeshare, y 31.6% a keda den otro tipo di acomodacion, conoci tambe como short-term vacation rentals.
SHORT-TERM VACATION RENTALS (STVR)
A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Den 2023, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo.
Si compara augustus 2024 cu augustus 2023 por wak cu e ocupacion averahe di e acomodacionnan aki a subi cu 8.1 punto di porcentahe, for di un averahe di 46.5% na augustus 2023 pa un averahe di 54.6% na augustus 2024.
2024 (YEAR TO DATE)
Te cu augustus 2024, Aruba a ricibi un total di 987,186 huesped “stayover”, esaki ta un crecemento di 17.5% compara te cu augustus 2023, unda a ricibi 839,99 huesped “stayover”. Ora ta yega na lider den mercado, te cu augustus 2024, 80.7% di e huespednan ta di Norte America, 4.6% ta di Europa, 12.2% ta di Latino America, y 2.4% tawata procedente di otro partinan di mundo.
JOIA Aruba by Iberostar ta habri su porta e di tres siman di December 2024!
ORANJESTAD – E prome di e 3 hotelnan nobo den construccion na Aruba ta habri dia 18 di December 2024 definitivamente. Ta trata di JOIA Aruba by Iberostar. Esaki a keda confirma pa e ehecutivo di e hotel Dominique Meyer na Noticiacla diahuebs. ‘Si, esey ta corecto” Meyer a bisa. Esey kier men cu pa e fecha ey, lo tin e apertura di e hotel di 240 camber. E otro hotelnan ta St Regis y Secrets di otro cadena cu tambe ta habri nan porta den e proximo 6 lunanan na Aruba.
Vd Wal: No ta trata paisnan Caribense den Reino igual den cuadro di supervision financiero!
ORANJESTAD – “Paisnan Caribense den Reino no ta wordo trata igual den cuadro di supervision financiero”. Asina ex miembro di e colegio di supervision financiero pa Aruba, CAft, Hellen van der Wal a bisa recientemente den su discurso di despedida. Noticiacla den un cantidad di articulo ta reproduciendo partinan di e discurso, cu a mustra interesante unda cu van der Wal ta basta critico riba e funcionamento di e colegio. Pa loke ta su observacion riba e trato no igual, e ta mustra por ehempel con e introduccion di supervicion financiero na Sint Maarten y Corsou a bai kompañá pa restrukturashon di debe. Esaki ta splica tambe pakico e paisnan ey a bay di acuerdo na 2010 pa regula supervision financiero na nivel gubernamental. Segun van der Wal ta sigui bisa, supervision den e paisnan ei ta basa riba e asina yama regla di oro. Asina ta haci’e mas facil pa e paisnan ey haci inversionnan, specialmente pasobra a regla cu nan por fia barata via Hulanda. “LAft, di otro banda, ta enfoca riba reduccion di e debe nacional debi na e situacion financiero na e momento ey. Inversionnan mester cuadra den e presupuesto. P’esei, prestamo pa esaki ta efectivamente imposibel” van der Wal ta sigui bisa.”Prestamo ta aumenta e debe nacional. “Ademas LAft no tin ningun facilidad pa prestamo barata via Hulanda”.
Ex miembro di CAFt: Curioso cu Hulanda kier Rijkswet awor, mientras Aruba ta cumpliendo
ORANJESTAD – “Hulanda awor kier un ley di gobierno como condicion pa e refinanciamento di e fianzanan di Covid. Esey tambe ta curioso, pasobra awor Aruba tin su ciclo di presupuesto na ordo” ta palabra di ex miembro di CAFt pa Aruba, Hellen van der Wal den un discurso recien. Van der Wal durante su despedida a tene un discurso, den cual ta mustra awor cu CAFt no tur ora a funciona mes bon y corecto. Den varios articulo, Noticiacla lo reproduci esaki e proximo dianan. Van der Wal a trece varios di su observacionan den su discurso, den cual ta nota cu e tabata ‘basta’ auto critico riba e trabou cu CAFt a haci durante e periodo cu e tabata miembro.
ATIA: Efecto di welga di wafnan na Merca por tin efecto pa Aruba
ORANJESTAD – Como gremio comercial ta sumamente importante pa keda na altura di situacionan internacional cu por tin un efecto riba nos mercado local. Un situacion asina ta pasando den mundo di logistica actualmente na Merca door di un welga riba wafnan na costa oost y e asina yama “Gulf Coast”, cu ta afecta e sector di exportacion/importacion, transporte maritimo y maneho di suministro di mercancia (“supply chain management”). ATIA asina a informa kico esaki por significa pa Aruba su economia local.
Miembronan Caribense di CFT tabata kier ‘kwijtschelding parcial’ di debe di Covid
ORANJESTAD – E miembronan Caribense di e colegio di supervision financiero pa Aruba CAFt y otro islanan CFT, tabata kier ‘kwijtschelding’ parcial di debenan di sosten di likides di Covid pa e islanan Aruba, Curaçao y Sint Maarten, y di BES. Algo interesante mirando cu tur e gobiernonan a pidi esaki, pero CFT a rechasa esaki. Awor ta resulta cu internamente, cos tabata ‘diferente’.
Venezuela a exporta cerca di US$ 6 miyon na mercancia pa Aruba y Corsou den 7 luna
CARACAS - Juan Gotopo, vice presidente di Camara di Comercio di La Vela de Coro den e estado di Falcón, a declara cu pisca ta e producto nobo cu ta wordo exporta for di Venezuela pa e isla di Curacao. E vice presidente di Camara di Comercio La Vela de Coro den estado Falcón, Juan Gotopo, a informa cu den e prome 7 lunanan di e aña aki, alrededor di US$ 6 miyon na mercancia a wordo exporta for di Venezuela pa e islanan di Curacao y Aruba. .
Follow NoticiaCla
