Aruba Summer Music Festival tin un meta pa cumpli cune

ORANJESTAD – E prome edicion di Aruba Summer Music Festival ta tuma lugar e siman aki. Fuera di e gozo musical y locura di artista internacional cu lo bishita nos isla, e festival mester logra su proposito principal tambe. CEO di Aruba Tourism Authority, Ronella Tjin-Asjoe a splica NoticiaCla.com. por ehempel, cu e festival mester genera por lo menos 1.7 miyon florin na cobertura/publicidad pa Aruba. Ademas e mester trece minimal 2.500 turista extra pa nos isla, y pa no lubida riba e mas di 20 periodista internacional cu lo mester yuda cu e cobertura. Tur esaki den un momento directo di 5 dia di actividad local y despues, lunanan di promocion pa nos isla.

APORTE FINANCIERO

Cu miras riba esaki, ATA a condiciona e organisadornan di tur e ariba menciona, prome cu a bay di acuerdo pa forma parti di e evento grandi aki. Y su participacion ta cu un aporte di 500 mil dollar den un proyecto cu, -for di informacion ricibi-, por costa organisadornan entre 2 pa 2.5 miyon dollar total. E ta inclui gastonan pa trece artista, ekipo y tambe e parti di logistica. E cantidad di artista internacional no ta ‘ken cu ta’, y ta varia di artistanan manera Carlos Vives, Pitbull te na Nicky Jam. Y como atraccion local, NutzBeatz. Y no mester lubida e anochi local diahuebs awor, unda cu bishitantenan lo por goza gratis di un anochi complete di e bandanan musical local.

MERCADO

Teniendo na cuenta cu ATA kier atrae un mercado di turista mas latino, a dirigi esaki riba e parti di Sur America, pero tambe e parti latino di Merca mes. Como tal, e genero di artista ta mas basa riba e genero latino aki. Carlos Vives y Jerry Rivera ta percura pa cumpli cu e grupo sur latino Americano, aunke nan tin nan fanatico mericano tambe. Pitbull y Nicky Jam ta percura pa e genero di Merca latino, aunke cu nan tin nan logronan latino tambe. Pues un mix practicamente perfecto cu, si tur cos bay manera mester, lo genera e 2.500 turistanan cu ATA ta enfoca ariba.

PRENSA INTERNACIONAL

Prensa internacional lo mester a genera e interes suficiente e lunanan prome cu e festival, y lo mester cubri e evento mes e siman aki. Periodistanan di Colombia Venezuela, Brazil y Argentina lo ta di bishita, hunto cu prensa di Inglaterra cu ta na Aruba relaciona cu un otro evento. “Nos lo inclui nan tambe den e festival”, Tjin-Asjoe a sigura NoticiaCla.com.