Carla Minet: Periodistanan investigativo den region mester traha hunto

ORANJESTAD - Periodistanan investigativo den region mester cuminsa traha hunto     Diabierna atardi  a tuma luga na Impact Hub Aruba e prome edicion di ‘Caribbean Journalism Seminar 2024’ cu a sirbi di escenario pa e lansamento di e prome asociacion di periodista profesional di Aruba ‘Red Arubiano di Prensa Profesional (RAPP)’ y a conta cu e presencia di un invitado internacional specialisa den periodismo investigativo.

Durante e seminario a conta cu un sala cu periodistanan y invitadonan interesa a haya sa un poco mas di e temanan presenta  durante prome evento di Red Arubiano di Prensa Profesional (RAPP) cu tabatin e participacion di invitadonan special manera: 

Luis Anibal Villegas cu a eherce como periodista na Aruba y na e momentonan aki ta traha como ‘freelance’ y ta studiante di Ley na UVA na Hulanda. Villegas a presenta “Lob-generator” un herment pa habitantenan di e islanan di Reino Hulandes por solicita informacion publico mas facil.

Marlon Kock: Experto den UX cu a elabora riba "Inteligencia Artificial y con e periodistanan por uz’e manera un ‘timemachine cu ta yuda den e produccion’, y Carla Minet (Orador principal) cu ta un periodista investigativo cu a participa den investigacionnan importante manera Panama, Pandora y Paradise Papers. E ta fungi como director ehecutivo di Centro Investigativo de Periodismo na Puerto Rico y a presenta e tema “Retonan y Oportunidadnan pa periodistanan den Caribe”. 

Akinan Minet a splica e escenario actual na diferente pais den Caribe y e retonan cu periodistanan ta topa. “Ta urgente pa periodistanan investigativo den e region cuminsa traha hunto riba storianan pa asina e pubico ta miho informa di e problemanan cu ta afecta nan y asina tene e forzanan na mando responsabel. Tambe ta importante pa traha hunto den e region pa asina por yuda otro, mirando e scarsedad di apoyo cu periodistanan tin, specialmente den cubri temanan dicifil na unda no tin recursonan suficiente y cu ta imposibel pa eherce e trabao sin cu hende conoce bo of por haya un otro trabao”, e ta splica.

Red Arubiano di Prensa Profesional (RAPP) ta un organisacion sin fin lucrativo cu ta dedica na stimula e practica liber di periodismo y normanan di comportacion etico. 

RAPP

RAPP ta traha pa inspira y educa e periodistanan actual y futuro periodistanan pa medio di desaroyo profesional y ta proteha e garantianan fundamental di libertad di expresion y libertad di prensa pa medio di su esfuersonan di defensa.  

E organisacion a establece su mes oficialmente como un asociacion, siguiendo e guianan etico di Asociacion di Periodista Hulandes (NVJ).  

For di januari, e fundadornan di RAPP Melissa Stamper, Andreina Morillo y Yorleny Oduber a bin cu e idea di crea un colectivo pa asina profesionalisa prensa na Aruba cu ta hopi necesario. Nan a reuni frecuentemente pa asina yega na un vision conhunto y asina a nace RAPP cu e obhetivo di trata e desafionan actual den e sector di prensa na Aruba.

E fundacion di e organisacion ta refleha un compromiso pa promove excelencia periodistico, preparando e caminda pa un ambiente profesional cu mas cohesion y mas inclusivo.