Caso di accidente ta sigui persigui VP di parlamento

ORANJESTAD – E accidente cu vice president di parlamento Chris Dammers a haye aden recientemente, ta persigui’e keto bay. E parlamentario awe a splica NoticiaCla.com mas riba e caso. E tabata necesario, mirando cu e prome declaracion cu e parlamentario a duna, aparentemente a crea mas pregunta cu contesta. Como tal riba NoticiaCla.com a bolbe aserca e parlamentario pa clarifica algun cos cu no a keda 'cla'. Na final, e parlamentario ta splica e.o. pakico polis no tabatey e anochi, y mas importante, pakico un ‘dalmento di un baki mata’ ta costa 10.000 florin of mas, y tambe si e parlamentario tabata ‘bebi’ of no.

CANSA

Segun Dammers, e anochi en cuestion, e tabata enberdad ‘cansa’, pero no ‘cansa’ di bebi, sino di dianan agita su tras. Hopi trabou, y actividadnan deportivo, a pone cu e tabata agota. “Mi no tabata burachi” Dammers a sigura NoticiaCla.com. Y loke e kier a haci di ‘bon intencion’ a sali’e di malo ora cu a opta pa no busca polis e anochi ey, ora di e accidente. E la pensa, como cu ta un incidente entre e y un baki mata di beton, cu no mester di intervencion di polis. A resulta despues, cu debi cu polis no tabatey e anochi ey y no a traha un rapport, seguro no ta cubri e sla di e auto. “Esey tabata mi fout”, Dammers ta admiti. Como tal e mes tin cu paga esey.

SUMA DI DAÑO

Pa loke ta e suma grandi (AWG 10.000) , tambe, segun Dammers, ta facil pa splica. E forma con e sla a tuma lugar, ta cu e baki (potchi) di beton a drenta den e parti banda di e wiel dilanti, cu a pega  y hala e parti di e wiel di tal forma, cu e auto no tabata manehable mas. Mientras cu e auto no ta total loss segun Dammers, e auto no tabata manehabel. Pesey e la wordo getakel pa cas di Dammers.

KITA DUDA

Pues, e puntonan menciona, segun Dammers, mester kita tur duda cu cosnan lo a bay diferente, segun e vice presidente di parlamento. E la siña su les, aunke e ta conciente cu e no ta e unico y cu enberdad ora cu algo asina sosode, ta bin henter un situacion su tras, cu e tin cu deal cune awor. Dos colega di dje di partido tabata envolvi den algo asina, y un colega di un otro partido. Y e ta corda con e asunto a keda persiguie. Y den e caso aki, sigur mirando cu e la usa auto di parlamento mes.

E ACCIDENTE

E accidente cu a sosode recientemente envolviendo   Dammers a haya un rabo riba social media, y a haya te hasta e nomber ‘”Vice Presidente Gate”, manera NoticiaCla.com a raporta caba. Lo ta acusando e parlamentario di AVP di a ‘plama’ e auto di parlamento lag’e na werki”. Tambe cu a core scondi’e y cu e asunto ta scondi. NoticiaCla.com a tuma contacto cu e persona en cuestion, cu a duna su version di e suceso.

KICO A SOSODE

Inicialmente, segun Dammers su prome raportahe pa NoticiaCla.com, e ta admiti cu e tabata envolvi den un accidente recientemente, usando e auto cu ta pertenece na parlamento. “ Na Savaneta den e bocht patras pariba di The Old Man and the Sea – (mi a) caba di baha un hende cu a bai e invitacion cu parlamento a haya, cu ta biba 5 cas pabou di e bocht”, Dammers ta cuminsa na splica. “ Mi so den auto a tuma e bocht un poco grandi y a dal un pochi mata rechts dilanti di e cas sin cura” e vice presidente ta sigui bisa. E ta sigui splica cu un takel wagen a bin, y a hiba e auto su cas, y no garage manera ta wordo bisa. Segun Dammers, e compania Forynsys a traha e rapport, segun e polisa. “ Seguro lo paga pa e pochi mata rondo di beton, ma no pa e auto” Dammers a sigui bisa. “ Mi no a jama polis paso mi no a ocasiona daño ni na un otro auto, ni na un hende, pero asina mes a duna kennisgeving na polis y a haya un raport di polis” e vice presidente a sigui bisa NoticiaCla.com. Pues segun Dammers, e accidente tabata entre ‘Ami cu e baki mata’. “E daño na e auto Ford Edge ta rond di 10.000 cu ami ta pagando” Dammers a continua bisando. E ta sigura cu e siguiente dia el a informa Staten, cu a jama e compania di ken parlamento ta lease e auto y nan a manda tackle wagen bin buske na su cas despues. Esey a sosode segun Dammers, y manera e ta finalisa bisando,' end of story'.