Dammers: Parlamento lo kibra reces pa trata ley di CAFT

ORANJESTAD – Parlamento di Aruba ta bay kibra reces pa logra pasa e ley pa supervision financiero, conoci como LAFT (Landsverordening Aruba Financieel Toezicht). Vice presidente di parlamento Chris Dammers a confirma na NoticiaCla.com dialuna, cu esey ta necesario pa ‘interumpi’ e reces y logra pasa e ley prome cu 1 di augustus proximo, y asina evita problema cu Hulanda. Mientrastanto otro siman , ta inicia un periodo ocupa pa parlamento unda cu tin cu pasa por lo menos dos ley den e mesun siman, esta e ley di Green Corridor y BAZV.

RECES NA PELIGER

Cu e informacion aki, Dammers ta confirma e informacion anterior di NoticiaCla.com, cu e reces di parlamento ta na peliger. Den e caso aki, Dammers ta mustra cu e reces lo cuminsa normal si, pero asina cu e ley ta cla pa drenta parlamento, lo interumpi esaki. E ora e lo percura pa yama suficiente hende (parlamentario) bek pa garantisa cu tin quorum. Den caso di AVP, esaki mester ta un total di 11 persona, di e 13. Ademas Dammers a confirma mesora tambe cu e mes lo ta esun cu lo presidi tur e reunionan di awor te ora cu reces tuma lugar y caba, pasobra e president mes, esta Marisol Lopez Tromp lo ta for di Aruba por lo menos te fin di luna di july ainda, pa motibonan personal. Lopez ta den exterior for di comienso di siman pasa. 

SERIE DI REUNION

E serie di reunion ta inicia otro siman dialuna (29 juni) pa 2’or ora cu trata e tema di Green Corridor, pa haya mas placa pa e proyecto conoci. Ta trata di un ley cu mester wordo atendi y trata  pa despues minister encarga Benny Sevinger firma un contracto pa esaki. Den curso di e siman aki, nos lo bin bek riba e embergadura di e ley aki, mirando cu aki tambe tin cosnan pendiente cu a hala atencion y cu merece mas investigacion.

BAZV

Despues cu e reunion aki finalisa ta premira cu pa mas tarda, fin di otro siman (sea diahuebs of diabierna) lo trata e reunion pa aumento di 1% di BAZV (Health tax), segun e amienda cu a wordo pasa durante tratamento di presupuesto. Cu e tratamento poni pa fin di otro siman, manera cu Dammers a programa, e ta surpasa e fecha riba cual e ley mester a drenta na vigor, esta 1 di july (otro siman diaranson). Pa cada dia cu e ley no ta na vigor, gobierno ta perde placa cu e mester pa por yuda baha e deficit. NoticiaCla.com a compronde cu ta importante pa pasa e ley awor, pasobra ta netamente den e dos lunanan aki, (juli y augustus), e ley ta genera mas fondo. Y un retraso por trece un ‘setback financiero’. Asina cu e retraso surpasa tres siman pa un luna, e ta nifica caba sumanan cu por core den miyones cu pais Aruba ta perde pa gana. A compronde cu mirando cu e ley aki lo no a keda cla, College Financieel Toezicht (CFT)  a bin cu e conseho pa añadi un extra ½ % pa por ‘haal in’ e schade di e retraso, door cu 'lo no logra' pasa e adaptacion di ley na tempo. Dammers a confirma cu e ley no ta uno dificil y cu e lo no tin dificultad ni tardansa pa pasa mesora. E ley mes no a yega parlamento si, pero ta programa pa drenta diamars, mas tarda diaranson, pa despues cuminsa trata esaki den commission central mesora. Y otro siman lo trate den reunion publico.

LAFT

E reunion simembargo cu ta hala mas atencion, ta esun di LAFT. Segun Dammers, e ley ta canando su caminda ainda, y no a drenta parlamento. Mirando cu pa 6 di jul, parlamento lo cuminsa su reces, esaki lo wordo ‘kibra’ despues di tal forma cu tin suficiente hende, (quorum di 11) pa e ley por pasa. Segun Dammers, no ta cuestion cu e ley no ta bay pasa. E ta sigur cu e ley ta pasa, pasobra ‘ta un compromiso entre dos pais, Hulanda y Aruba’, pues cu lo haci tur posibel pa e pasa prome cu 1 di augustus. Asina e ta cumpli cu e protocol. Manera cu NoticiaCla.com a raporta, si Aruba no cumpli cu e fecha, e lo por haye cu un Algemene Maatregel van Rijks Bestuur, cu ta nifica cu Hulanda lo encarga su mes cu maneho di Aruba su finansa publico. Y for di informacion fidedigno, e maatregel lo ta riba mesa asina cu e fecha yega y vence.