Partido CURPA a presenta nan prome candidatonan pa eleccion parlamentario

ORANJESTAD – Partido politico CURPA a presenta su prome 5 candidatonan valido pa e eleccion parlamentario di dia 6 di December proximo. Segun e lider di partido Eric Ras, e actualmente e partido tin 8 miembro confirma y kier logra haya mas ainda y ta den proceso pa esey. A anuncia cu nan concepto e biaha aki ta di un trein cu ta move, y di cual su ultimo parada ta Parlamento di Aruba. “Nos a crea un trein pa Aruba ‘step aboard’, e presidente di e partido y alabes #4 di e partido Max Robert a bisa durante e conferencia di prensa. 

PLAN DI PARTIDO

E partido a bisa cu nan kier bay pa cambia constitucion di Aruba unda cu entre otro pueblo ta vota pa un parlamento y cu otro eleccion pa scohe e miniwsternan. Tambe e partido ta basa sum es riba e concepto di revoca ley contra mal gobernacion, reforma esaki y recupera e loke ta bon. Nan ta contra matrimonio di mesun sexo y tambe contra e concepto di SDG 2023. 

CANDIDATONAN

Eric Ras a keda presenta como candidato number 1 riba e lista y alavez e lider di partido. Un subinspector di polis di profesion. E candidato cu a hala atencion tabata candidato # 2, cu ta ex integrante di MEP y di AVP Arondino Croes. Croes na 2017 a keda laga for di partido AVP ora di traha lista y a bandona e partido e momento ey. A cuminsa yuda CURPA tras di cortina pa e proximo eleccion di 2021. E biaha aki, e tabata cla y hunto cu e partido, a yega na un acuerdo pa activamente ta riba e lista y figura como number 2, un number cu hunto cu e partido a yega na acuerdo di dje. Otro candidato cu a presenta su mes ta Janeth Orozco, un colombiano di nacemento pero cu 31 aña biba na Aruba y ta labora den e mundo di laboratorio. Tambe a presenta su mes, Ashan Tromp, como candidato #3, un waiter di profesion. E 5 candidatonan aki a presenta nan mes, faltando 3 mas pa presenta nan mes publicamente. 

SONDEO

Segun e partido, a haci un sondeo y ta mustra cu nan tin derecho di existencia y cu e biaha aki nan lo haci un diferencia. A siña di fayonan di pasado y nan ta cla pa e reto. Ademas nan kier ta e alternativa Cristian pasobra nan ta sinti cu e grupo Cristian no ta representa den Parlamento. Nan ta sostene e 18 mil personanan cu a firma contra matrimonio di mesun sexo, y por a compronde cu nan ta busca e sosten di e grupo particular aki tambe. 

DISPUESTO PA DIALOGA CU OTRO PARTIDONAN CHIKITO

A bisa tambe cu nan ta dispuesto pa dialoga cu otro partidonan chikito pa un possible bloke, contal cu nan respeta e ley di Dios.