Corda participa den e prome encuesta di Noticiacla pa eleccion parlamentario 2024

ORANJESTAD - Dia 6 di December 2024 tin e proximo eleccion parlamentario pa Aruba. Manera a bira un tradicion caba pa Noticiacla.com, nos ta conoci pa encuestanan politico (entre otro) y e biaha aki no ta diferente. Despues di basta tempo sin haci encuesta, nos a pensa cu ta momento atrobe pa cuminsa cu e encuestanan aki, pa midi e pensamento entre e lectornan di Noticiacla.com. Nos ta basta leu ainda pa e fecha mes, y ta te dia 18 di oktober ta conoce e listanan politico valido pa e eleccion. Pero ya caba Noticiacla kier sinti e ambiente politico y kico ta biba entre su lectornan. Cu esaki den mente, nos kier sa si bo ta mas cerca cu bo decision pa cu bo voto pa dia 6 di December 2024. Nos lo haci mas encuesta segun e fecha di eleccion yega cerca y manera cu e lista di partido bira definitivo. Manera semper, bo participacion ta keda anonimo pa nos, y e resultado ta pa uso netamente noticioso. Ademas ta pidi pa solamente esnan di edad di 18 aña bay ariba participa y cu bo ta un residente di Aruba. Nos ta gradicibo pa bo participacion. E encuesta lo ta di awe diamars 17 di September 2024 te diasabra 21 di September 2024 y e resultado lo keda publica dialuna otro siman. Pa participa por click AKI.