Nicole Hoevertsz oficialmente no ta participa pa posicion di presidente di Comite Olimpico Internacional

ORANJESTAD – Aruba su ‘representante’ olimpico, miembro di e COmite Olimpico Internacional Nicole Hoevertsz oficialmente no ta participa den e contienda pa bira e proximo presidente internacional di IOC (Comite Olimpico Internacional). Esaki a bira conoci oficialmente e siman aki ora cu 5 otro candidato si a entrega nan candidatura pa e funcion. Entre nan tin Sebastian Coe, Kirsty Coventry, Juan Antonio Samaranch Jr, Morinari Watanabe, y Johan Eliash. Nan a confirma nan participacion pa e eleccion cu lo tuma lugar otro aña na maart.

HOEVERTSZ

Hoevertsz a declara recientemente cu mientras e ta un honor pa tin e funcion ey, e condicionan y exigencianan di e funcion, ta hacie imposibel pa (awo) e pone su nomber. Entre nan, e mester muda pa Suiza y asina tin mas otro motibo valido segun Hoevertsz pa e rechasa e oferta aki. Ademas, e tin un encargo hopi pisa awor, cu ta di ta na cabez di e comite organizador di e proximo weganan olimpico 2028 na Los Angeles. Si Hoevertsz a acepta, e tabatin un hopi bon chens di keda eligi y asina hiba Aruba su nomber aun mas halto den e mundo deportivo. E funcion riba su mes tin un status gubernamental, ya cu bo ta na mesun nivel cu un hefe di estado, riba plataforma internacional.