Dama ta malversa fundacion pa vacantie pa Aruba

GAITHERSBURG - Un trahado di e asina yama ‘The Humane Society of the United States (HSUS)’ na Merca ta wordo acusa di horta placa for di donacionan destina originalmente pa yuda rescata y cuida bestia. E placa horta, e kier a usa pa paga pa un vacacion luhoso na Aruba.

KICO A SOSODE

E staff na ‘The Humane Society of the United States (HSUS)’ tabata sorprendi cu e empleado, - Atiya Pope,37, di estado di Virginia-, ta wordo acusa di a horta miles di dollar di e fundacion unda cu e tabata traha. Segun polis di e condado di Montgomery, Pope regularmente tabata usa e ‘Diners Club International’ credit card di compania pa haci multiple compras entre februari 2013 y januari 2015. E la ‘supuestamente’ usa $17,307 dollar pa paga 12 transaccion di auto di huur, y $13,868 dollar pa cuminda, gasoline y un vacantie pa Aruba. Na tur, Pope ta wordo acusa di a malversa $31,175 dollar di su doño di trabou.

VACANTIE

“E kier a bay Aruba, e ora e mester a bay cu su propio placa y riba su propio tempo. P’esey tin vacacion” un residente di su condado a comenta. Na januari ultimo Pope, a wordo transferi pa un supervisor nobo. Despues di un auditoria di raportahe laat di placa, e gerente ey a nota un cantidad di cargonan fraudulento. Investigadornan a bisa cu durante un entrevista cu gerencia di e compania, Pope a admiti di malversa e placa. Pero e no a paga nada bek. Mientrastanto e la perde su trabou na e fundacion.

CASTIGO PRISON

Pop,e cu a usa su account di twitter pa bende sapato di hilchi pa damas, nunca no a reacciona na peticio di e canal di television ABC 7News pa comentario. E loke mas a dal duro ta cu e la haci esaki cu un fundacion cu no tey pa haci ganashi. Si haya Pope culpable, e por haya un castigo di prison di 20 aña. Wak e raportahe di television aki.