CONFIRMA: Otmar Oduber ta tuma partido PPA over pa bay eleccion

ORANJESTAD – Diamars anochi ex minister Otmar Oduber a confirma na noticiacla cu e la caba keda cla cu e tramite, y cu awor e por confirma cu e ta tuma e partido oranjo PPA over. “ Mi tin e honor di por carga e partido, cu den su gloria tawata e partido mas grandi cu Aruba a yega di conoce, y lant’e bek haci’e e partido patriotico di orguyo y union na Aruba” Oduber a bisa noticiacla. Awor e trabou mes ta cuminsa pa busca e sosten. “Mayan mi lo busca e sosten y apoyo di mi hendenan pa esaki na cas di mi mayornan den un reunion na Ponton” Oduber a caba bisa.

ACUERDO NOBO

Segun Oduber, ta apenas diamars atardi, e la keda cla cu e union strategico aki pa tuma e partido over y sali cu e partido aki pa e proximo eleccion. Pues mientras cu e la keda cla pa tuma e partido, awor e trabou ta cuminsa pa convence su hendenan pa bay cune riba e jornada aki. Y depende con esaki bay, e por anuncia oficialmente cu e la haya e sosten di su hendenan y cu nan ta sostene su plan pa tuma PPA over. 

PLATAFORMA PAIS

Segun Oduber, Plataforma PAIS lo sigui existi como Plataforma y lo fungi como un think thank di e partido politico. Inicialmente tabata e intencion pa e bay eleccion cu e Plataforma ey, pero despues no a keda cla cu e registro y manera cu Noticiacla a anuncia anteriormente, a keda e posibilidad pa tuma un partido existente over, manera otronan a haci den pasado recien. 

ELECCION PASADen e eleccion pasa PPA a haya bida be ora cu conocido comerciante y religioso Lissette Malmberg a tuma e partido over y a hibe pa eleccion na 2021. Sinembargo e no a logra haya suficiente sosten pa logra un asiento, no obstante cu e la core un campaña moderno, cambiando te hasta e logo den algo mas ‘moderno’. Awor ta keda na Oduber, pa si logra rebiba e partido cu segun historia, su famia mes a profila aden. 

BENDICIONSegun Oduber, su tio Gustavo ‘Dolfi (DOC)’ Oduber ta esun cu a dune e bendicion pa drenta politica na 1997. Dolfi mes tabata diputado pa e partido ora cu a cuminsa cu e combersacion di Status Aparte na Hulanda. Y awor Otmar Oduber mes ta bay profila riba e prestigioso partido cu tanto e y su coleganan a lucha pe segun e principionan di Juancho Irausquin.