Analisis: Con FUTURO di eleccion ta mustra?

Scirbi pa Tito Laclé

Diadomingo anochi e parlamentario independiente mr Gerlien Croes a lansa su partido politico FuTURo, den pleno Casibari Rock Formations. Acompaña pa famia, amigo y simpatisantenan, e la kita tur duda cu tabatin (ainda) pa mas di un aña di kico e lo a bay haci cu su futuro politico. E evento riba su mes tabata uno cortico, al caso y cu e simple meta pa confirma loke cu hopi tabata sa: Gerlien ta bin cu un partido propio. Loke porta tabata mas interesante, ta ken tur tabatey y cu a mustra sosten publicamente. Y cu enfasis riba e palabra publico. Palancanan fuerte di e partidonan berde y geel cu a dicidi di laga e partidonan tradicional y bay pa algo ‘nobo’. Tambe a nota un shift di personanan di por lo menos un partido (chikito) cu awor a uni cu Gerlien. 

Si hopi tabata duda cu e politico hoben a tarda cu su lansamento, diadomingo, a bira conoci cu e silencio ey tabata djis pa ‘consumo publico’, y no pasobra e no tabata cla ainda. A compronde diadomingo cu mientras cu ‘pafo’ cos tabata keto, ‘paden’ e makinaria tabata trahando duro duro. E forma di presentacion, e creacion di e anticipacion, tur tabata mustra hopi professional, y e lansamento despues tambe. Si e la haci un impacto completo suficiente, mester mira ainda. A compronde cu for di februari ultimo e politico hoben a inscribi su partido caba. Ta papia so e no tabata papia riba dje. Ban wak si e strategia aki ta suficiente y lo funciona den su fabor. 

E pregunta cu varios tabata haci desde diadomingo, ta ki efecto e partido ta bay tin riba e electorado. Si e entrada di Gerlien su partido ta suficiente pa haci un ‘deuk’ den e momentum di e partido geel, y si e ta haci mas daño na e partido berde, of cu ta trata simplemente di un partido cu ya ta wordo considera caba como un AVP 2.0.  Mientras cu e lansamento di e partido tabata ok, e loke ta mas importante y cu a haci falta diadomingo, ta un programa politico pa acompaña e lansamento. Mientras cu Gerlien a papia di un vision pa futuro, e no a bisa ‘ainda’ con e kier logra e vision ey. Pa realmente haci un cambio fuerte, Gerlien lo mester bin cu un programa di partido cu bon contenido pa por representa un alternativa pa tur dos partidonan grandi tradicional y tambe esunnan chikito. Esei ta dificil ora bo tin poco tempo. A lo menos cu e la prepara esaki den tur silencio manera cu e la haci cu e lansamento. Tampoco nos no sa ken mas y con capacita e otro integrantenan di fuTURo lo ta.Berdad cu a mira personanan di peso di otro partidonan presente, pero esey no ta suficiente realmente si no sa kico nan ‘input’ real ta. Loke ta realidad, ta cu e panorama politico awor ta fertil pa algo ‘nobo, grandi y diferente’. E ta asina fertil cu por bien ta cu e por bira e alternativa contra e dos tradicional, MEP y AVP, si e programa di partido ta bon suficiente. Y si esey sosode, e por bira e proximo partido cu posiblemente MEP mester bay tene cuenta cu ne pa forma un proximo coalicion. Of, e ta bira djis un partido mas cu a nace, pero cu debi na su lista di candidato y programa politico, no ta convence suficiente pa duna nan mas voto y asiento, y cu e ta keda solamente na e prome candidato, den e caso aki, Gerlien so. Mescos cu a sosode cu mayoria di e otro partidonan ‘chikito’. Por bien ta tambe,- y esaki ta uno hopi ambicioso -,  cu Gerlien su partido, (manera cu a sosode cu partido PAR na Corsou na 1994, ora cu e la lansa su mes como un partido politico, y a bay cu 8 di e 14 asientonan den su prome salida) por convence suficiente votador, pa e ta e ‘PAR’ di Aruba y haci loke cu aworaki partido geel, MEP ta boga pe, esta goberna su so. Loke ta na su beneficio, ta cu e no a ‘goberna ainda’, pues no tin un ‘bagage’ pa compara. Loke ta strob’e ‘ainda’, ta e percepcion cu e ta un verlengstuk di e partido cu e la bandona, esta AVP. Un forma camufla pa keda cu esnan ‘desapunta’ den AVP, pero cu awor no tin cu bay mucho leu, y por keda hunto, bou un ‘otro bachi’. Y si mester traha cu AVP, por bisa ‘ata MEP a traha cu Otmar Oduber, siendo un enemigo ‘mortal’, dus pakico nos no?’. Y nan por bisa ‘ta pueblo a dicidi’. 

Un obervacion general ta cu lo bai tini un gran cantidad di partidonan chikito di cua nos por bisa di awor caba cu varios di nan lo no saca un asiento paso nan ta come di otro y matematicamente ta 21 asiento ‘so’ tin. E otro partidonan ‘chikito’, of ‘alternativa’, ta mucho ‘bezig’ cu nan mes. Nan a mustra caba cu nan no tin interes pa traha hunto, sino nan lo a hacie caba. Un problema cu nan tin, ta e ego, cu ta stroba nan di logra esaki, y e diferente concepto di e partidonan. Ta mustra cu niun ta dispuesto pa ‘sacrifica’ nan posicion pa laga un persona otro ‘lidera’ e bloke cu mester sali for di e union aki. Partido RED siman pasa ainda a confirma cu nan a purba caba, y no a logra. Nan lo sigui haci e intento, pero cos ta mustra scur. E forma con ‘publicamente’ e partidonan ta atacando otro, ta mustra cu nan ta leu di kier forma un bloke pa confronta e dos partidonan tradicional. Cu e partidonan grandi cu nan base di 6 of 7 asiento, no ta resta hopi pa parti pa e restonan cu lo no haya e kiesdeler y dus favorece e dos partidonan grandi cu restzetels. E yamada pa mas unidad den partidonan chikito no tabata ni asina un mal idea.  Echo ta bai bira cu "no hay asientos para tantos partidos".  

Loke hopi ta teme, y por ta un realidad, ta cu varios di nan lo por mantene nan hendenan, pero manera ultimo biaha, no logra suficiente impacto, cu finalmente lo resulta den mas ‘rest zetel’ pa e partido cu haya mas voto, cu di loke cos ta mustra, lo por ta partido MEP. 

Si e partido fuTURo, no resulta e FUTURO desea, por bien ta cu pa ‘falta di otro escogencia’, e gran mayoria ta scohe pa algo mas ‘sigur’, cu ta MEP, mirando cu mayoria ta sinti cu AVP ta mucho ‘kibra’ ainda pa tin un efecto berdadero riba MEP. Den seno di AVP ta mustra y haci como si fuera nan ta e alternativa. Pero e partido falta hopi pa drecha y ainda ta afecta pa e resultado hudicial di un di su miembronan mas importante. Diadomingo, a ‘swap’ un miembro di famia pa e otro, pero e fam a keda mescos. Benny Sevinger a entrega su yiu muher Stephany pa ta su reemplasante e eleccion aki. Cu e ta bay haci e diferencia, tin di wak, aunke mayoria ta kere cu lo maximo cu e por haci, ta wanta e votonan di su tata. Pero pa haci un efecto cu e ta e salbador di e partido manera cu e la wordo presenta diadomingo anochi, mester keda proba ainda. Partido AVP no a echt presenta nada nobo, sino e mesun storia di semper, cu ta cu nan ta e alternativa y cu tur cos lo ta miho cu nan na mando. Y ta mustra cu e lider ta haci como si fuera e partido ta para mas fuerte cu nunca, cu tambe hopi ta cuestiona y ta puntra, den cua mundo e ta bibando. Partido MEP ta practicamente usando e mesun strategia, esta cu nan ta e partido pa scohe, y cu nan a haci suficiente bon trabou pa bolbe haya e confiansa. Pero den e partido ey tambe tin varios cos cu a bay robez y cu ta bay afecta nan. Porta menos cu AVP, pero realidad ta cu nan tambe lo sufri. Ta bin e ‘historia politico’, unda cu ningun partido a logra goberna tres termino sigui. Pero tambe tin e pensamento cu den politica, no tin logica. Y por bien ta cu historia ta prueba tur hende robez, y cu MEP por logra gana eleccion atrobe, y kizas hasta su so si e partidonan chikito, no materialisa nan votonan suficiente, incluyendo esun cu aworaki tin e strea halto, esta fuTURo.