Sindicatonan cu ultimatum pa Gobierno di Corsou, sino tin welga grandi

WILLEMSTAD - Direktivanan di e sindikatonan ku ta representá empleadonan públiko i trahadónan igual, ABVO, Sitek, STrAF, NAPB i SAP ta disponibel 24 ora pa dia pa hiba deliberashon ku promé minister Gilmar ‘Pik’ Pisas. E último fecha ku e reunion aki por tuma lugá ta djamars 17 di sèptèmber. Asina e sindikatonan a informá minister enkargá ku e kartera di Maneho di Gobernashon, Planifikashon i Servisio Públiko, Shalten Hato.

E sindikatonan ta bisa di ke reuní ku Pisas a base di kartanan di 17 di mei i 17 yüni 2024 ku a manda pa Konseho di Minister i ku no a risibí kontesta riba dje. Tambe e petishon pa reunion ta a base di informashon ku a risibí serka minister Hato riba e proposishon di gobièrnu pa revoká e lei pa kòrta ku 12,5 porshento riba kondishon laboral di ámtenarnan.

Den nan karta di 17 mei e sindikatonan ta informá Konseho di Minister ku nan ta preokupá pa un kantidat di asuntu ku ta hunga den seno gubernamental, partikularmente den e komishon sentral di sindikatonan kaminda gobièrnu ta ko-responsabel pa toma di desishon. Banda di revokashon di e lei di 12,5 porshento ta trata di pago di e debe di “loontrede” òf 3 porshento di lumpsum di 2018 i 2019, reparashon di e lei di penshun, hubileo di personal ku hasi 45 aña den servisio, proseso di solisitut na Kuerpo Polisial di Kòrsou i e organisashon nobo di servisio di impuesto. E karta di 17 yüni ta un rekordatorio di e karta di 17 mei.

REUNION

Awe, djaluna 16 sèptèmber sindikato ABVO ta tene for di 8’or di mainta un reunion general ku tur miembro pa duna nan informashon riba e último desaroyo relashoná ku e lei di 12,5 porshento. E disputa ta e fecha ku ta revoká e lei. Gobièrnu su proposishon ta pa hasi esaki entrante 1 yanüari 2024 miéntras ku e sindikatonan ke bai bèk te 1 yanüari 2023. Nan ta bisa ku esaki ta e palabrashon original.

Pa 4’or di atardi ABVO ta tene alabes un seshon di informashon ku penshonadonan pa splika nan ku den kaso gobièrnu revoká e lei ku forsa retroaktivo te 1 yanüari 2024 nan tampoko lo no haña indeksashon di penshun di aña 2023 pasobra e ámtenar no ta haña indeksashon salarial na 2023. Manera EXTRA a informá for di siman pasá, minister Hato den e reunion di GOA di djaweps 12 sèptèmber a presentá ku ekspertonan di fondo di penshun di APC pa splika e punto aki mas aleu na sindikatonan pasobra e no ta asina simpel.

Un di e puntonan ta ku pa duna e penshonado indeksashon riba aña 2023 ta wak e grado di kobertura di e fondo di 2022. Na 2022 e grado di kobertura aki no tabata sufisiente pa duna un indeksashon di penshun na 2023. Pues ni maske e ámtenarnan haña indeksashon di salario na 2023, e penshonado no por haña indeksashon di penshun na 2023 pasobra e grandi di kobertura na 2022 no tabata sufisiente. Ta bin aserka ku promé ku APC por indeksá e penshun e aktuario eksterno di e fondo mester duna un konseho positivo manera EXTRA ta komprondé.

Banda di ABVO e sindikato Sitek tambe lo tin un reunion general awe djaluna 16 sèptèmber pa tur su miembronan pa informá nan di e último desaroyonan. Esaki lo tuma lugá 7’or di anochi. Despues ku sindikato NAPB a bisa di no ta planiá pa yama un reunion general, ta resultá ku a disidí ku ta pone un reunion tòg awe awe djaluna 16 sèptèmber pa 9’or di mainta na nan sede. Sindikato STrAF a disidí ku nan ta bishita miembronan na boka di trabou pa asina duna informashon. pa loke ta sindikato STrAF, presidente Amado Vilchez ta splika ku kaga organisashon sindikal tin su strategia i ku SAP tambe tin esun di dje i ku esaki lo bira konosí na su debido tempu.

Lòs for di e reunionnan general aki di e sindikatonan individual ta kologá den laira un posibel reunion bou di ora di trabou di tur 5 sindikato huntu pa djaweps 19 sèptèmber awor.