FBI: Ta parce cu Trump tabata blanco di atake atrobe, sospechoso a keda aresta

WEST PALM BEACH - E candidato presidencial di Merca, Donald Trump, aparentemente a resulta blanco di un atake atrobe diadomingo, FBI ta bisa. Un homber a keda descubrí cu un arma na e porta di e clup di golf caminda Trump tabata hunga golf. Despues e sospechoso a wordo tira riba dje pa guardianan di seguridad. El a wordo aresta.

Trump a wordo trece lihe na un luga sigur. E incidente a sosode na su Trump International Golf Club na West Palm Beach, Florida.

Segun Servicio Secreto, e sospechoso tabata mas o menos 350 pa 450 meter di distancia for di e ex mandatario. Polis a haña un arma AK-47 cu un visier, dos tas di lomba y un camara GoPro riba e sospechoso. Ora e la wordo descubrí, el a hui den un SUV y a wordo aresta un distansia cortico. 

Varios medio Mericano ta informa cu e sospechoso su nomber ta Ryan Wesley Routh. Tres oficial halto di polis a bisa MSNBC ku e tin 58 aña di edat.

No ta cla si e tabata a punto di los un tiro of Trump of su guardianan di seguridad. E sospechoso tabata pues centenares di meter for di e ex mandatario, pero “cu un tipo di rifle asina cu un scop cu no ta un distancia grandi”, e sheriff local a bisa.