Croes: Salario minimo ta surpasa 2000 florin pa luna na januari 2025

ORANJESTAD - Minister di Labor Sr. Glenbert Croes a anuncia diabierna   cu despues di dos aña di trayectoria, Conseho di Minister di Gobierno di Aruba a aproba salario mínimo pa ora. Un aumento cu lo beneficia significativamente tur trahado aki na Aruba. E cambio aki ta resultado di hopi analisis y investigacion cu a inicia na 2022 y ta drenta na vigor 1 di januari 2025.

Salario minimo pa ora ta representa progreso importante pa un salario mas husto.

Te cu dia di awe, tur trahado tabata cobra e mes un salario independientemente di cuanto ora pa siman nan traha. Pero awo, cu e implementacion di e salario minimo pa ora, esaki ta bay garantisa un aumento substancial, mehorando directamente e condicionnan laboral. Cuminsando 1 di januari 2025,  tur trahado cu ta traha 40 ora pa siman lo haya un aumento di Afl 20.85 kedando cu un salario mensual di AWG 2007.05 compara cu AWG 1986.20. E trahado cu ta traha 45 ora pa siman lo ricibi un aumento di AWG 271.73 kedando cu un salario mensual di Afl 2257.93 compara cu AWG 1986.20. E potret ta di archivo di noticiacla di ora cu minister Croes a firma pa e cambio di salario minimo pa 2024.