Reces di parlamento di Aruba na peliger

ORANJESTAD – E periodo di reces di parlamento di Aruba ta na peliger. E reces ta programa pa cuminsa ya for di 6 (oficialmente 7) di juli. Y ainda parlamento mester trata un cantidad di ley importante, di cual porta esun mas importante, ta e ley di supervision financiero conoci como LAFT (Landsverordening Aruba Financieel Toezicht). Mirando cu falta apenas 3 siman pa e reces, y cu tin un cantidad di ley prome cu Laft, e reces ta definitivamente na peliger, pasobra parlamento mester percura pa un quorum pa reunionnan por continua.

RVA Y KABGA

NoticiaCla.com a haci su ronda y a confirma for di tanto secretaris di Raad van Advies Hellen vd Wal como director di gabinete di gobernador Rajen Budhu Lall cu ningun di dos ta bay cu reces, pa (RvA) por sigui traha riba e leynan y pa (Kabga) sigura cu tin un gobernador pa por firma ley ora cu nan drenta. Cu esaki, e ta pone presion riba parlamento cu si e otro dos instancianan no ta bay cu reces, dificilmente parlamento si por. Y si tuma nota cu awe den Bon Dia Aruba, vice presidente di parlamento Chris Dammers ta sigura cu lo tin quorum, ta nifica cu e reces ta na peliger.

RECES

Normalmente e reces ta nifica cu parlamento ta ‘shut down’ pa asina duna tur hende (specialmente e trahadonan administrativo) un chens pa bay cu vacacion. Ta pa casonan urgente so, ta yama parlamento bek, of ta cancela e reces aki. E aña aki e reces ta inicia dia 7 (actualmente for di dia 6 caba) di juli, y ta te 18 di augustus proximo. For di awe te cu e fecha ey, tin apenas 3 siman di tempo, den cual tin cu trata 4 ley, segun propio declaracion di Dammers.

BAZV Y LAFT

NoticiaCla.com a compronde cu lo trata e ley di aumento di BAZV pa 2%, entre 30 di juni pa 3 di juli. Esey ta nifica cu e ta laat caba, mirando cu e ley mester a drenta na vigor 1 di juli proximo. Como tal College Financieel Toezicht a propone recientemente (conseho 4 di juni) pa aumenta e BAZV cu mei porciento ainda pa ‘haal in’ e perdida debi na e retraso di e introduccion di e aumento.

UNDA E LEYNAN TA

Despues ta keda 3 dia pa trata mas reunion prome cu e reces. Y manera ta conoci, e ley di supervision ta entre gobierno y RvA. For di vd Wal, NoticiaCla.com a compronde pues cu nan a dicidi di no tuma reces pa por traha riba tur e leynan cu tin, incluyendo e LAFT. E no por a bisa si nan tin e ley di LAFT pa tratamento si. A compronde cu e ley ta serca gobierno of a sali for di gobierno rumbo pa RvA. Y cu e informacion ey, ta conoci cu RvA mester por lo menos 2 luna pa por trata e ley aki. Unabes cu e ley pasa e ‘parti ey’, e ta bay bek gobierno pa por ahusta e recomendacionnan di RvA den e ley, pa despues pase pa parlamento. Ta e ora numa, por cuminsa schedule un reunion publico pa su tratamento. Esey ta tuma su tempo mirando cu e ley ta uno complica (compara cu BAZV cu ta ‘simplemente’ un ahuste), y cu parlamentarionan mester haya tempo pa profundisa nan mes riba esaki.

PROTOCOL

Contrario na BAZV, si pa 1 augustus proximo LAFT (landsverordening Aruba Financieel Toezicht) no ta un ley firma, Aruba lo ta den violacion di e protocol firma di 2 di mei, cu consecuencia cu Conseho di Minister di Reino lo implementa un Maatregel van Rijskbestuur. De hecho, NOticiaCla.com tin informacion cu e proceso pa e AMvRB ta canando su caminda caba, premirando cu Aruba lo no keda cla na tempo cu e ley aki. NOTA. Foto parlamento archivo.