DIMP: Por cuminsa paga impuesto di vehiculo di motor di aña 2025
ORANJESTAD – Departamento di Impuesto (DIMP) a anuncia cu na e momentonan aki tur contribuyente automobilista por cuminsa haci pago di impuesto di vehiculo di motor di aña 2025. Di e forma aki Departamento di Impuesto ta permiti e contribuyentenan pa haci e pago mas trempan, dunando asina mas espacio financiero pa por cumpli cu nan deber fiscal. Manera ta conoci, e automobilista por scoge pa paga su impuesto di vehiculo di motor den un solo biaha of den mas biaha haciendo uzo di e servicio di pago parcial.
TARIFA DI IMPUESTO
Pa aña 2025 e tarifa di impuesto di vehiculo di motor ta keda igual cu e añanan anterior.
PLACH’I NUMBER NOBO
Pa aña 2025 lo tin plach’i number nobo cu ta valido pa 5 aña, pues te cu aña 2029. Pa cada vehiculo di motor cu no ta brommer, Departamento di Impuesto ta otorga 2 plachi di number grandi. No lo bay otorga e plachinan chikito mas manera den pasado. Pues cada vehiculo lo tin e dos plachinan grandi solamente. E costo di e plachinan ta Afl. 14.
Pa brommer, e costo di e plachi chikito ta Afl. 10. Pa ambos, mester paga esaki solamente e prome aña cu e plachi sali, pues pa e otro 4 añanan no mas.
Na momento di haci pago di impuesto, mester paga extra Afl. 14 of Afl. 10 pa por ricibi e plachinan nobo.
SERVICIO DI PAGO PARCIAL
Pa por facilita e contribuyentenan mas tanto posibel, Departamento di Impuesto ta brinda e servicio di pago parcial mescos cu durante añanan anterior. Cu e servicio aki e contribuyentenan por paga e impuesto di vehiculo di motor adelanta y den pida pida. Na e momentonan aki e contribuyentenan lo tin 5 luna di tempo prome cu e fecha final di 31 di januari 2025 yega. Haciendo uzo di e servicio di pago parcial, e contribuyente por parti e peso financiero durante e lunanan venidero. Esaki ta beneficioso pa por ehempel e contribuyentenan cu ta den dificultad financiero of cu tin mas cu un auto. Pa e empresanan cu tin hopi auto, esaki ta un bon oportunidad tambe pa haci uzo di e servicio di pago parcial.
E CONDICIONNAN DI SERVICIO DI PAGO PARCIAL
E condicionnan pa e servicio di pago parcial ta lo siguiente:
-Ta paga e impuesto delanta, esta prome cu dia 31 di januari 2025.
-Ta haci e pago pa luna.
-Ta paga e suma minimo rekeri sea Afl. 50 of Afl. 200 (depende e categoria di plachi).
-No por paga menos cu Afl. 50 a menos cu e debe (restante) ta menos.- Ta haci e ultimo pago no mas laat cu dia 31 di januari 2025.
E servicio di pago parcial ta valido unicamente pa pago di impuesto di vehiculo di motor.
PAGO MINIMO TA DEPENDE E CATEGORIA DI PLACHI
E pago minimo pa luna ta depende den cua categoria di plachi e vehiculo ta registra.
Alabes Departamento di Impuesto ta recomenda su contribuyentenan pa paga via e sistema di Online Banking di Aruba Bank, Banco di Caribe of CMB, uzando e metodo di “Bill Payment”.
Pa e pagonan online por wordo procesa debidamente, ta importante pa inclui e siguiente informacion:
1. Persoonsnummer na cual e vehiculo ta registra.
2. Number di auto.
3. E periodo di cuenta cu ta pagando (por ehempel: jan-jun 2025).
Pa esnan cu ta haci uzo di e servicio di pago parcial y ta haci pago via banco: por pidi e recibo online despues di completa e ultimo pago di e impuesto. Pa pidi e recibo online mester haci esaki via nos website www.impuesto.aw, selecta Digitale formulierenKwitantie motorrijtuigbelasting y sigui e instruccionnan.
Por acudi tambe na e oficina principal na Camacuri, e MFA-nan of edificio di Post Aruba na San Nicolas pa haci pago di impuesto di vehiculo di motor.
E FECHA FINAL
Dia 31 di januari 2025 ta ultimo dia cu por paga e impuesto di e prome mita di aña 2025. Pa e vehiculonan cu ta cay den e categorianan MFA, MFV y Plachi di nomber, mester paga e impuesto di aña 2025 completo pa dia 31 di januari 2025.
Despues di 31 di januari 2025 no ta posibel mas pa paga e impuesto di e prome mita di aña 2025 den pida pida.
DEBE ATRASA
E contribuyentenan cu tin debe di impuesto di vehiculo di motor atrasa, no por paga e impuesto di aña 2025 tanten cu no a caba di paga e debe atrasa. E contribuyentenan aki por paga e debe den un solo biaha of por haci un areglo di pago pa e debe te cu aña 2024. E areglo di pago ta encera un termino maximo di pago di 3 luna. Pues, mester paga e debe atrasa den 3 pago. Pa por wordo permiti pa paga e impuesto di aña 2025, e contribuyente mester paga por lo menos un termino di pago riba su debe atrasa.
CUMPLI NA TEMPO
No ta necesario pa warda te ora e fecha final di 31 di januari 2025 ta cerca pa cumpli cu e pago di impuesto. Manera conoci, e contribuyente lo haya un boet di 50% pa incumplimento den caso cu no haci pago of haci e pago laat. Sea ta haci pago di impuesto den un solo biaha of den varios biaha, Departamento di Impuesto ta recomenda pa cumpli na tempo y evita asina gastonan innecesario.
JOIA Aruba by Iberostar ta habri su porta e di tres siman di December 2024!
ORANJESTAD – E prome di e 3 hotelnan nobo den construccion na Aruba ta habri dia 18 di December 2024 definitivamente. Ta trata di JOIA Aruba by Iberostar. Esaki a keda confirma pa e ehecutivo di e hotel Dominique Meyer na Noticiacla diahuebs. ‘Si, esey ta corecto” Meyer a bisa. Esey kier men cu pa e fecha ey, lo tin e apertura di e hotel di 240 camber. E otro hotelnan ta St Regis y Secrets di otro cadena cu tambe ta habri nan porta den e proximo 6 lunanan na Aruba.
Vd Wal: No ta trata paisnan Caribense den Reino igual den cuadro di supervision financiero!
ORANJESTAD – “Paisnan Caribense den Reino no ta wordo trata igual den cuadro di supervision financiero”. Asina ex miembro di e colegio di supervision financiero pa Aruba, CAft, Hellen van der Wal a bisa recientemente den su discurso di despedida. Noticiacla den un cantidad di articulo ta reproduciendo partinan di e discurso, cu a mustra interesante unda cu van der Wal ta basta critico riba e funcionamento di e colegio. Pa loke ta su observacion riba e trato no igual, e ta mustra por ehempel con e introduccion di supervicion financiero na Sint Maarten y Corsou a bai kompañá pa restrukturashon di debe. Esaki ta splica tambe pakico e paisnan ey a bay di acuerdo na 2010 pa regula supervision financiero na nivel gubernamental. Segun van der Wal ta sigui bisa, supervision den e paisnan ei ta basa riba e asina yama regla di oro. Asina ta haci’e mas facil pa e paisnan ey haci inversionnan, specialmente pasobra a regla cu nan por fia barata via Hulanda. “LAft, di otro banda, ta enfoca riba reduccion di e debe nacional debi na e situacion financiero na e momento ey. Inversionnan mester cuadra den e presupuesto. P’esei, prestamo pa esaki ta efectivamente imposibel” van der Wal ta sigui bisa.”Prestamo ta aumenta e debe nacional. “Ademas LAft no tin ningun facilidad pa prestamo barata via Hulanda”.
Ex miembro di CAFt: Curioso cu Hulanda kier Rijkswet awor, mientras Aruba ta cumpliendo
ORANJESTAD – “Hulanda awor kier un ley di gobierno como condicion pa e refinanciamento di e fianzanan di Covid. Esey tambe ta curioso, pasobra awor Aruba tin su ciclo di presupuesto na ordo” ta palabra di ex miembro di CAFt pa Aruba, Hellen van der Wal den un discurso recien. Van der Wal durante su despedida a tene un discurso, den cual ta mustra awor cu CAFt no tur ora a funciona mes bon y corecto. Den varios articulo, Noticiacla lo reproduci esaki e proximo dianan. Van der Wal a trece varios di su observacionan den su discurso, den cual ta nota cu e tabata ‘basta’ auto critico riba e trabou cu CAFt a haci durante e periodo cu e tabata miembro.
ATIA: Efecto di welga di wafnan na Merca por tin efecto pa Aruba
ORANJESTAD – Como gremio comercial ta sumamente importante pa keda na altura di situacionan internacional cu por tin un efecto riba nos mercado local. Un situacion asina ta pasando den mundo di logistica actualmente na Merca door di un welga riba wafnan na costa oost y e asina yama “Gulf Coast”, cu ta afecta e sector di exportacion/importacion, transporte maritimo y maneho di suministro di mercancia (“supply chain management”). ATIA asina a informa kico esaki por significa pa Aruba su economia local.
Miembronan Caribense di CFT tabata kier ‘kwijtschelding parcial’ di debe di Covid
ORANJESTAD – E miembronan Caribense di e colegio di supervision financiero pa Aruba CAFt y otro islanan CFT, tabata kier ‘kwijtschelding’ parcial di debenan di sosten di likides di Covid pa e islanan Aruba, Curaçao y Sint Maarten, y di BES. Algo interesante mirando cu tur e gobiernonan a pidi esaki, pero CFT a rechasa esaki. Awor ta resulta cu internamente, cos tabata ‘diferente’.
Venezuela a exporta cerca di US$ 6 miyon na mercancia pa Aruba y Corsou den 7 luna
CARACAS - Juan Gotopo, vice presidente di Camara di Comercio di La Vela de Coro den e estado di Falcón, a declara cu pisca ta e producto nobo cu ta wordo exporta for di Venezuela pa e isla di Curacao. E vice presidente di Camara di Comercio La Vela de Coro den estado Falcón, Juan Gotopo, a informa cu den e prome 7 lunanan di e aña aki, alrededor di US$ 6 miyon na mercancia a wordo exporta for di Venezuela pa e islanan di Curacao y Aruba. .
Follow NoticiaCla
