Ling & Sons y FTA a firma CAO nobo

ORANJESTAD – Cu un ora y mei di retraso, diasabra mainta , sindicato y doño di supermercado Ling & Sons a firma nan CAO (Contracto Colectivo Laboral) nobo valido pa 2 aña, y asina sigura trankilidad laboral. Un esfuerso di tanto sindicato, compania y trahadonan cu a logra un adelanto sigur riba varios punto. Diasabra mainta, dilanti di e edificio, e doño mes di e compania Gerard vd Tweel a bin pa firma e documentonan hunto cu director Richard Eman y presidente di sindicato FTA, Hubert Dirkz.

ADELANTO NAN LOGRA

Entre e adelanto nan, tin un aumento di bonus di 0.3% cu ta ekivalente na un luna di salario. E bonus tabata 8% y awor ta bira pues 8.3%, cu manera cu e director a bisa, ta traduci den un ‘dertiende maand’. Ademas a regla e asunto di dia liber miho unda cu ora cu tin actividadnan special, e trahadonan por haya esaki liber. Tur otro beneficio adkeri ta keda igual y ta garantisa segun e presidente di e sindicato. Eman a subraya e hecho cu e trahadonan tin un areglo di pensioen, prome cu gobierno a haci esaki obligatorio. Ademas 95 % di e trahadonan ta den ‘vaste dienst’ y ta gosa di miho salario cu practicamente tur otro supermercadonan. Partidonan a firma e CAO y a despues bebe salud riba dje.

PROBLEMA ULTIMO ORA

Mester bisa cu pa falta di comunicacion, dado momento diasabra mainta a surgi un tardansa pa firma, pasobra di desacuerdo riba cierto puntonan. Informacion importante cu no a yega na e partidonan necesario, na tempo, a pone cu ora cu a mira e documento diasabra, a tuma nota cu e no tabata corecto. E ora a core cambia cierto puntonan, print documentonan di nobo pa asina ainda por a firma e CAO e mainta ey mes. Esey tabata motibo pa e retraso di caso mas cu un ora.