Hospital di Corsou (CMC) ta bai ricibi Nafl. 252 miyon di gobierno den 4 aña

WILLEMSTAD - CMC ta bai risibí un total di 252 mion repartí den kuater aña. Gobièrnu ta informá ku pa garantisá kontinuidat di kuido den CMC i pa protehá salubridat públiko, a inkluí kontribushonnan finansiero adishonal (spesífikamente destiná pa CMC) den e presupuesto nashonal pa 2025 (i pa mas aña) di akuerdo ku e siguiente relato kompañá ku tabèl:

CMC Vastgoed no tin ku paga e gastunan di kapital (interes i amortisashon) di 18 mion na Pais, esaki ta nifiká ku gobièrnu lo tene kuenta ku entrada di interes i risibimentu di amortisashonnan for di CMC Vastgoed. Komo resultado, e gastunan di hür di 18 mion florin ku CMC Vastgoed ta kobra CMC Exploitatie por baha. E ora ei e gastunan pa funshonamentu di CMC lo ta 18 mion florin ménos. SVB lo usa e 18 mion florin ku a spar (pa motibu ku SVB mester finansiá ménos gastu di hür) pa finansiá otro gastunan di CMC. SVB lo no baha e presupuesto di kuido ku 18 mion florin (pa motibu di e redukshon di e gastunan di hür). Esaki ta nifiká pues ku CMC Exploitatie lo risibí un kontribushon finansiero adishonal di 18 mion florin pa saldo. SVB lo inkorporá e suma di 18 mion florin den e presupuesto di kuido, via e fondo di seguro básiko (BVZ) entrante 2025, pa finansiá e gastunan di kuido di CMC.

GASTUNAN RELASHONÁ KU NO-ASEGURADONAN

Ademas, for di 2025 (i pa mas aña) a inkluí un suma di 10 mion florin den e presupuesto nashonal pa finansiá e gastunan di kuido di personanan no sigurá. Si e gastunan di kuido pa esnan ku no ta sigurá ta mas abou ku 10 mion florin, SVB lo evaluá si mester usa e suma restante pa finansiá otro gastunan spesífiko di CMC.

KONTRIBUSHON FINANSIERO ADISHONAL DI PAIS

E presupuesto di mas aña ta kontené tambe un kontribushon nashonal adishonal na SVB na balor di 10 mion florin pa e añanan 2025 i 2026. Esaki ta destiná pa finansiamentu di funshonamentu di CMC Exploitatie via e presupuesto di kuido.

Esaki lo yuda fortalesé e sistema di kuido i garantisá akseso na e servisionan médiko nesesario pa komunidat. E montante aki lo oumentá na 20 mion florin entrante 2027. E oumento aki ta suprayá e kompromiso di gobièrnu pa garantisá kuido i bienestar di komunidat riba término largu. E rekursonan adishonal aki ta di gran importansia pa kontinuidat di kuido i fortalesimentu di e sistema di kuido médiko na Kòrsou.

Kontribushon pa mehorashon di kondishonnan laboral

Ademas, a inkluí den e presupuesto nashonal (pa mas aña) tambe un kontribushon nashonal adishonal di 3 mion florin na SVB. Esaki kontribushon adishonal akí ta destiná pa mehorá kondishonnan di trabou di e personal di CMC (ku no ta spesialistanan médiko, ni gerensia na e nivel di mas altu, pa motibu di e Landsverordening Normering Topinkomens). Esaki ta fundamental pa garantisá ku tin sufisiente personal bon kualifiká disponibel pa mantené un nivel haltu di dunamentu di kuido na CMC.

KUIDO ADISHONAL NA CMC

Kompará ku 2023 i 2024 SVB a inkluí un montante adishonal di 9 mion florin pa aña for di 2025 den e presupuesto di kuido pa CMC.

Medidanan pa mehorashon di efisiensia dor di CMC

Un agensia di investigashon eksterno a informá gerensia di CMC den kuadro di e Hoofdlijnenakkoord entre Pais i CMC, ku CMC por logra spar un montante total di 14 mion florin for di kuater medida di ekonomisashon, na un manera relativamente simpel (“Low Hanging Fruits”). Te awor, CMC a logra spar 6 mion florin for di e 14 mion florin, pues ainda tin 8 mion florin na medida di ekonomisashon ku mester implementá. Pa kompletá informashon, ta raportá ku e agensia di investigashon eksterno no a hasi un estudio di efisiensia real, sino ku solamente el a menshoná kuater medida di spar simpel den su rapòrt. Den e siguiente periodo, lo pidi Outoridat di Salubridat di Kòrsou pa duna informashon tokante e posibilidatnan nobo di efisiensia den CMC, pa asina por diskutí esaki ku gerensia di CMC pa implement’é. Ta fundamental pa redusí e gastunan pa funshonamentu di CMC dor di optimalisá e prosesonan i e uso efisiente di e rekursonan. Analisando e proseduranan i gastunan eksistente na un forma krítiko, CMC no solamente por ahustá gastunan, pero tambe mehorá e efektividat general i kalidat di kuido. E meta ta pa krea un base finansieramente sólido ku ta permití CMC kumpli na un manera sostenibel ku su deber di kuido na poblashon.