Segun carta di MEP, RAIZ tambe a para fuerte pa un candidato ora MEP tabata ‘contra’

ORANJESTAD – No ta RAIZ so a pidi MEP pa cambia nan candidato postula pa un posicion manera cu a sosode awor. Esey ta resulta awor segun e carta cu premier Evelyn Wever Croes a manda pa lider di RAIZ dialuna, riba e tema di presidencia di Parlamento. Segun e carta, Wever-Croes ta recorda Arends cu den pasado MEP tambe a mustra nan desaprobacion pa un candidato cu RAIZ a postula, den e caso aki pa funcion di minister plenipotenciario, pero cu RAIZ a nenga di cambia. Ta trata di abogado Ronald Wix cu na final mes a retira su candidatura. Mientras cu e situacion tin algo di similaridad, e diferencia ta cu e candidato no a keda y no ta conoci kico MEP lo a haci si e candidato a keda. 

SORPRENDE

Tambe e carta ta pone luz riba e secuencia interno di cos con esaki a bay y cu MEP a keda ‘sorprendi’ di e ‘peticion’ emiti ‘verbalmente’ pa RAIZ pa prome biaha diahuebs siman pasa, pa cu e cambio y apenas diadomingo a bin por escrito. Ademas, segun Wever-Croes, loke ta mas remarkable ta cu Arends no por a ‘substancia’ e peticion y ‘keho’ pa cu e desconfiansa den Edgard Vrolijk y cu mas aun, dia 8 di September ainda den un reunion, Arends ‘mes a indica di no ta na altura di esaki’. 

RENEGOCIA E ACUERDO

Por compronde di e carta tambe cu MEP lo tabata dispuesto pa renegocia e acuerdo di gobernacion. E carta ta bisa na final ‘Al menos cu RAIZ kier renegocia e acuerdo pero esaki no a wordo pidi pa RAIZ’. 

E CARTA MES

Pa loke ta e carta mes, e resto ta mas bien un splicacion di nobo di e proceso, acuerdonan logra y con esaki mester a wordo respeta pero cu segun Wever-Croes a keda viola.