Vd Tweel: “Situacion Jan Hup den man di gerencia na Hulanda”

ORANJESTAD – No ta solamente Jan Hup pero otro personanan tambe a duna ‘un motibo’ pa e cu loke a sosode loke ora cu tabatin un intercambio mahos entre trahadonan y Hup luna pasa. Esaki ta pensamento di e doño di Ling & Sons, Gerard vd Tweel, cu tabata na Aruba e weekend aki pa firmamento di CAO. Segun e doño, e no ta kita afor cu e suseso ta algo nunca no mester a sosode. “Nos ta desaproba e actitud aki completamente”. Pero si Hup ta bolbe Aruba y Ling & Sons, vd Tweel no kier a bisa. “E ta un asunto entre gerencia di e persona. Te ey mi kier lag’e”.

UPDATE

Diasabra ultimo despues di firmamento di e CAO entre FTA y e supermercado, vd Tweel riba pregunta di NoticiaCla.com, a splica lo ultimo riba e situacion di e gerente Jan Hup y e compania. Vd Tweel a repasa e ‘despensa ofreci na e coleganan afecta di e supermercado’. “Mi ta compronde hopi bon cu tin hendenan cu a sinti nan mes geshocked, y cu esaki nunca lo mester a sosode”.

FUTURO JAN HUP

Pero e ora e la bisa cu e sa tambe cu e ‘explosion di emocion’ no a sosode su so, sino cu tin hendenan cu a actua di tal forma cu a conduci na algo asina. “Sr Hup ta riba ‘non-actief’, y e gerencia na Hulanda ta hopi ocupa cu e asunto aki y te ey mi kier laga e asunto”. Pero riba insistencia di NoticiaCla.com, a puntra si e persona aki ta wordo kita di trabou, y of si e persona ta bolbe Aruba pa posiblemente traha bek na Ling & Sons. “Mi a bisa cu e directiva ta ocupa cu e asunto aki, y cu ta un asunto riba nivel gerencial. Masha danki”, van den Tweel a bisa finalmente, mustrando cu e no tabata dispuesto pa bay den mas contenido riba e tema. Como tal, no ta conoci si Jan Hup ta wordo kita, of si e ta bolbe Aruba den futuro, pa sigui traha cu Ling & Sons.

E SUSESO

Algun tempo atras (18 di mei), tabatin un intercambio mahos di palabra entre e tempo ey gerente Jan Hup, y algun trahado di Ling & Sons cu e momento ey a caba bolbe di un accion. A cuminsa un gritamento contra e trahadonan unda cu Hup a yama e trahadonan pa tur sorto di cos y por poco a agredi un di nan. E gerente finalmente a wordo manda cas, y a bula bay Hulanda (riba propio decision segun director di e compania a bisa despues), unda cu e ta aworaki. A bisa enberdad cu e lo a wordo suspendi, pero no tabata conoci ki futuro lo tabatin pa su persona. Scucha e declaracion di Gerard vd Tweel completo aki.