Artweek a finalisa cu un experiencia expectacular di Arte y Cultura
SAN NICOLAS – Caya grandi di San Nicolas a yena di color, creatividad y cultura durante e tan anticipa Art Week Aruba 2024. E edicion di e aña’ki tabata un celebracion extraordinario, transformando e curason di e ciudad den un pintura bibo cu a capta e imaginacion di local y turista pareu.
Durante e curso di un siman, mas di 100 artista talentoso di Aruba y rond mundo a bini hunto na San Nicolas pa exhibi nan creatividad. Nan piezanan increibel di arte, bayendo di mural te na instalacionnan bibo, a trece un rosea nobo di bida den e caya principal, lagando atras un legado vibrante cu lo ta aprecia pa hopi aña nos dilanti.
Elogio special ta bay pa e talento Arubiano Elisa Lejuez como e prome artista cu tabatin dobel participacion den Art Week como un diseñador di moda pa Art Fashion como tambe un pintor durante Art Fair. El a logra adopta e tema di Activa completamente y a ilustra esaki den su pintura y coleccion di paña cu ta representa e mensahe principal di Art Week 2024, resultando den un reaccion positivo di conocedonan di arte y exito comercial. Nos ta contento di mira cu tur su piesanan a bende.
“E evento no solamente tabata un treat pa wowo, pero tambe un testimonio di e poder cu arte tin pa trece comunidad hunto, asina fundado y director Tito Bolivar a comenta. “Art Week Aruba 2024 no lo tabata posibel sin e dedicacion y trabou duro di un cantidad di boluntario, diseñador, bailarin y musico cu a contribui cu nan tempo y talento pa haci di e siman aki uno inolvidabel. Nan esfuerso colectivo a crea un experiencia cultural total cu a eleva e escena artistico di e isla na un nivel nobo.”
Otro momento importante tabata e presentacion oficial, diadomingo anochi, di e mural 'Vibrant Echoes'. E prome trabou conhunto di Paul Wong cu Armando Goedgedrag mustrando e muchanan Lincoln Jones y Jahyah Eisden den disfraz di Carnaval pa rindi tributo na e importancia di San Nicolas den e celebracion y e union di e dos gruponan mas grandi, TOB y Champagne.
E acogida grandi y interaccion di e comunidad a haci di e evento ki uno en berdad special y a sigura cu e spirito di creatividad y colaboracion lo sigui bibo riba nos bunita isla.
Mientras cu e mural y recuerdonan di Art Week Aruba 2024 ta keda cu nos, nos ta fiha tambe nos bista riba hopi mas aña di celebracion di arte na San Nicolas y henter Aruba.
Kiwanis Club of Palm Beach a reparti 17 Child Car Seat
ORANJESTAD – Diasabra 28 di september, 2024, Kiwanis Club of Palm Beach conhuntamente cu Wit Gele Kruis a reparti 17 Child Car Seats na famianan den necesidad. Ta bon pa menciona cu ta di 22 aña cu ta yuda famianan yega na un Child Car Seat pa seguridad di nos muchanan riba careteranan di Aruba.
Adrienne Tromp ta oficialmente gradua como prome Openbaar Apotheker studia na Aruba
ORANJESTAD - Apotheker Adrienne Tromp a gradua oficialmente como prome openbaar apotheker cu a haci su specialisacion akinan na Aruba. Botica di Servicio actualmente tin tres openbaar apothekers (cual ta inclui Adrienne Tromp, Anoeska Wever y Dasha Dubero hunto cu nan otro apothekers) mustrando cu Botica di Servicio ta sigui traha riba brinda e miho calidad di servicio.
Women’s Club of Aruba a lansa iniciativa "90 Mata pa 90 Aña"
ORANJESTAD - Recientemente Women’s Club of Aruba (WCA) a inicia nan proyecto “90 Mata pa 90 Aña” en conexion cu celebracion di su 90 aniversario sirbiendo nos isla. Cu un plantamento simbolico di e prome mata na Biblioteca Nacional Aruba – Arubiana/ Caribiana den Bachstraat kier enfoca riba mehoracion di Medio Ambiente na Aruba y pa laga un herencia duradero pa e generacion di futuro.
Trahadonan di Aruba Bank y famia a participa den “Coastal Cleanup Day”
ORANJESTAD - Aruba Bank su trahadonan y famia a yuda limpia costa na Rincon Beach durante e “Coastal Cleanup Day” organiza pa Banco Central di Aruba. E esfuerzo di cada participante a haci un gran diferencia pa proteha nos dushi isla. Hunto, nos ta tene Aruba limpi pa e futuro generacionnan, y nos por sigui disfruta di nos medio ambiente limpi y sostenibel pa hopi aña mas.
Fundacion Cultuurfonds Caribisch Gebied (CCG) a celebra 70 Aña
ORANJESTAD – E Fundacion Cultuurfonds Caribisch Gebied (CCG) a celebra cu orguyo su 70 aña, marcando otro decada di contribucion cultural y desaroyo den nos comunidad. Un di e momentonan mas emocional tabata e despedida di Lourdes Croes, cu a dedica 30 aña di servicio voluntario na e fundacion. Su compromiso incansabel y pasion pa preservacion cultural a laga un marca inolvidabel riba e organizacion y riba e comunidad en general.
Grupo di prensa local a celebra ‘Dia di Prensa’ cu Hilton Aruba Caribbean Resort & Casino
ORANJESTAD – Un grupo di prensa local di Aruba diaranson a keda entreteni pa e grupo gerencial di Hilton Aruba Caribbean Resort & Casino, den cuadro di e reciente Dia di Prensa cu tabata 1 di September 2024. A opta pa haci e celebracion aki mas laat, debi na e agenda ocupa di prensa. Cu asistencia di gerente di mercadeo Joanne Dirksz, e grupo di prensa a experencia algo diferente unda cu nan por a pinta, sip, y come un cuminda prepara pa e hotel. Riba beach, e periodistanan invita tabatin como tarea pa reproduci un cuadro cu mester a representa tres boto di bela, laman y solo di Aruba. Cu guia di artista Elisa Lejuez, e periodistanan a bira artistanan un rato produciendo cada uno nan respectivo obra. Despues e hotel a ofrece e periodistanan un cena riba beach tambe, cu un variedad di posibilidad. Un momento sigur ameno durante cual e periodistanan por a relaha y disfruta di algo differente, cortesia di e hotel.
Follow NoticiaCla
