MFK a forma acuerdo di gobernacion cu partnernan nobo KEM y Jesus-Leito

WILLEMSTAD. – Despues ku Partido Movementu Futuro Kòrsou (MFK) resientemente a ekspresá ku nan no tin konfiansa mas den nan partner di koalishon Partido Nashonal di Pueblo (PNP), ayera tabata dje leu ei ku Partido MFK, Partido Kòrsou Esun Mihó (KEM) i e miembro independiente Zita Jesus-Leito, a firma un programa di gobernashon ‘Na kaminda pa rekuperashon i un mihó kalidat di bida pa e siudadano.’ E akuerdo aki a bira realidat despues ku KEM i Jesus-Leito a ekspresá nan apoyo na partido MFK.

Segun e miembronan di koalishon nobo aki, ta indiká ku e kambio ta enfatisá e importansia di kontinuidat den gobernashon i poniendo interesnan di pueblo riba polítika partidista. Pues, ta esensial pa e kontribushon spesífiko di e partnernan nobo di koalishon den e polítika aktual di gobièrnu. integrá. Den e akuerdo aki, ta bin dilanti e puntonan di atenshon di tantu KEM komo e miembro independiente Zita Jesus-Leito. Den tur dos kaso nan a pone  énfasis i a enfoká riba akshon konkreto i resultado tangibel.

KEM

Pa loke ta trata e kontribushon di partido KEM nan ta enfatisá riba implementashon di e siguiente puntonan. KEM ku lo keda enkargá ku Ministerio di Desaroyo Sosial, Labor i Bienestar Sosial (SOAW), lo pone  énfasis riba revisá lei di trabou pa promové un merkado laboral ku ta funshoná optimal. Fortalesé kontròlnan laboral pa garantisá kumplimentu di leinan i reglanan riba kondishonnan di trabou. Kuminsá ku konstrukshon di un kompleho pa hende grandi na Banda Ariba. Krea i implementá un programa di alivio di debe. Implementá penshun general pa empleadonan pa garantisá un nivel digno di bida. Reforma di fondo i fasilidatnan sosial. Intensifiká koperashon ku SEFBA pa promové kalidat di bida den bario, ku enfoke spesial riba hende grandi i hóben.

Den estrecho koperashon ku Ministerio di VVRP, konstrukshon di kas sosial pa kumpli ku nesesidatnan di kas i p’asina aliviá e nesesidat di kas.

ZITA JESUS-LEITO

Pa loke ta trata kontribushon di e miembro Independiente Zita Jesus-Leito, ta enfatisá ku ta di vital importansia pa proyektonan finansiero, ekonómiko, i sosial ku ta tumando lugá kontinuá sin interupshon. Esaki pa evitá ku lo hasi daño na kredibilidat di Kòrsou. Pa Jesus-Leito ta importante enfatisá riba integridat atministrativo i komunikashon transparente ku komunidat.

Puntonan ku Jesus-Leito lo enfoká ariba ta, finalisashon di e proseso pa lanta un empresa nobo di telekomunikashon pa kompetí den promové e sektor, ku lo kondusí na mihó servisio, tarifa aksesibel i mas libertat di eskoho pa konsumidónan.Bin ku akshonnan riba término kòrtiku pa atendé ku e oumento di preis di komestibel p’asina garantisá  siguridat di kuminda. Den koperashon ku Ministerio di VVRP implementá medidanan di término kòrtiku pa mehorá transporte tantu pa pueblo di Kòrsou komo pa turista, konsiderando e areglo vigente.

Kontinuá ku proyekto turístiko den desaroyo ku énfasis riba oumentá entrada. Esaki ta konta tambe pa kontinuá ku implementashon (MOU) relashoná ku peska i agrikultura.

Tambe atenshon na finalisashon di e proseso legislativo riba energia sostenibel, kombiná ku, un kampaña di konsientisashon i programanan edukativo den kolaborashon ku e Ministerio di Edukashon, Siensia, Kultural i Deporte (OWCS).

Finalmente konkretisá e aspekto di impuesto di turismo, ku repartishon di e entrada na MEO/CTB, VVRP pa asfaltá kaya i tambe pa loke ta GMN, maneho di naturalesa i finansa pa seguro pa indokumentadonan.

Firmamentu di e akuerdo aki, a tuma lugá den un ambiente festivo i por a opservá optimismo entre partidonan i tambe legria.